उपराष्ट्रपति बारे मन्त्रिपरिषदया बैठक
येँ (सन्ध्या टाइम्स)/उपराष्ट्रपति परमानन्द झाया सेवा सुविधा कटौती याःगु बारे सहलह यायेत थौं मन्त्रिपरिषदया बैठक च्वनेत्यंगु दु ।
शपथ प्रकरणय् लाकाः उपराष्ट्रपति झाया पद निष्त्रि्कय जूवंगुया नापनापं सरकारं वय्कःया छेँय् च्वंगु नेपाःया ध्वाँय् व गार्ड चीकेगु नापं सेवा सुविधा नं कटौती याःगु खःसा सरकारया थ्व ज्यायात कयाः मधेशवादी दलतय्सं तीव्र असन्तोष प्वंका वयाच्वंगु खः ।
सरकारं थौं च्वनीगु बैठकयात नियमित बैठक धाःसां थ्व खास यानाः उपराष्ट्रपति प्रकरणय् मधेशवादी दलतय्सं यानाच्वंगु विरोध बारे सहलह यायेत हे सःतूगु बैठक खः धाःगु दु। सत्ताय् दुथ्याःगु स्वंगुलिं मधेशवादी दलतय्सं थुकिया विरोध याःगु दुसा सत्ताया प्रमुख साझेदार जुयाच्वंगु फोरम (लोकतान्त्रिक) या न्हय्म्ह सभासद्तय्सं ला सरकारयात बियातःगु समर्थन हे लित कायेमाः धकाः दवाव बियाच्वंगु दु ।
अथे हे थौंया बैठकय् अवरुद्ध जुयाच्वंगु संसदया गतिरोध चीकेगु बारे नं सहलह जुइगु खँ धाःगु दु। न्हियान्हिथं सदन अवरुद्ध जुयाः मन्त्रालयया विषयगत बजेट विनियोजन बारे तकं सहलह जुइ मफयेवं थौंया मन्त्रिपरिषदया बैठकय् उकियात कयाः नं सहलह ब्याकेत्यंगु खः ।
