छेँ दुनाः छगू हे परिवारया स्वम्ह मस्त सित
पाल्पा (सन्ध्या टाइम्स)/ पाल्पाया तानसेन देउराली गाविसय् छखा छेँ दुना वयाः अन द्यनाच्वंपिं स्वम्ह मस्त सीगु दु। थौं सुथय् ४ बजे आकाझाकां उगु छेँ दुना वःगु खः। उकी लानाः झिंखुदँ दुम्ह पुष्पा सारु, झिंप्यदँ दुम्ह रामबहादुर सारु व झिंछदँ दुम्ह रोमन बहादुर सारु सीगु खः ।
म्हिगः बहनी लिबाक तक स्थानीय क्लबं क्यंगु प्याखं स्वयाः लिहां वःपिं मस्त मांम्ह द्यनेधुंकूगुलिं लिकसं च्वंगु गोठ यानातःगु छेँय् द्यंवंपिं खः। मस्तय् अबु छुं दँ न्ह्यवंनिसें विदेश वंगु खःसा मांम्ह मेगु छेँय् द्यनाच्वंगु खः। उकिं उकी लानाः मांबौपिं धाःसा छुं मजुल ।
स्वम्हं मस्तय् शव थौं सुथय् स्थानीय जनताया ग्वाहालिं लिकाःगु दु। छथाय् द्यनाच्वंपिं उपिं स्वम्हेसिया शव कानाच्वंगु अवस्थाय् लुइकूगु खः। छेँ दुनाः अन लहिनातःपिं निम्ह म्येय् नं सीगु दु ।
