किताब बन्द जुइवं नेप्से २७ अंकं क्वय्
येँ (सन्ध्या टाइम्स)/लगातार कुहां वनाच्वंगु नेप्से परिसूचक म्हिगःया कारोबारं २७ अंकं मल्याक कुहां वंगु दु। वंगु छुं दिं न्ह्यः निसें वाणिज्य समुहया कारोबार असामान्य ढंगं कुहां वनाच्वंगु खःसा म्हिगः नविल बैंकया शेयरय् वःगु र्हास प्रमुख कारण जुल। बोनस व लाभांश इनेगु धकाः घोषणा याःगु नविल बैंकंया किताब बन्द जुइवं थुकिया लिच्वः नेप्सेय् लाःवंगु खः ।
नविलया शेयरय् म्हिगः प्रति कित्ता १५९९/- तका कुहां वयेवं नेप्से नं २७ दशमलव ४२ अंकं कुहां वयाः ६३० दशमलव ११ अंकय् थ्यन। वंगु झण्डै लछि लिपा नेप्से थुलि उच्च रुपं कुहां वःगु खः। सेन्सेटिभ नं १० दशमलव ४७ अंकं कुहां वःगु दुसा फ्लोट ३ दशमलव शून्य ५ अंकं कुहां वःगु दु।
नेप्सेया कथं शेयरय् थुकथं भाः कुहां वयेवं आःयात थुकिया कारोबार स्थगित यायेफुगु सम्भावना दुगु खँ धाःगु दु। अथे हे फाइनानस समुह पाखें नं आईएमई फाइनान्स कम्पनीया शेयरय् नं १६४/- तका कुहां वयेवं थुगु समुहया स्थिति नं खराब जूगु दु ।
म्हिगः दकलय् अप्वः वाणिज्य समुह ४७ दशमलव २ अंकं कुहां वयेवं ६२६ दशमलव ३१ अंकय् थ्यंगु दु। थ्व धुंकाः विकास बैंक समुह ७ दशमलव ९८ अंकं कुहां वयाः ६७९ दशमलव ७५ अंकय् थ्यंगु दुसा फाइनान्स समुह ६ दशमलव ७९ अंकं कुहां वयाः ६४५ दशमलव ७७ अंकय् थ्यन। अथे हे जलविद्युत समुह शून्य दशमलव ६८ अंकं कुहां वयाः ८५२ दशमलव ९१ अंकय् व विमा समुह शून्य दशमलव १८ अंकं कुहां वयाः ६२८ दशमलव ८४ अंकय् थ्यंगु दु ।
नेप्सेया दां कारोबारय् नं बुलुहुँ कुहां वयाच्वंगु दुसा छन्हु न्ह्यः स्वयां शेयर न्याये-मी जुइगुली छुं भचा थहां वंगु दु। ख्वीनिगू कम्पनीया छगू लाख नीछद्व न्यासः व न्हय्च्यागु कित्ता शेयर न्याये-मी जुयाः खुगू करोड चय्गुंगू लाख पीस्वद्वः तकाया कारोबार जुल ।
नविल बैंकं दांया ल्याखं दकलय् अप्वः निगू करोड ख्वीगुंगू लाख नीन्हय्द्वः तकाया कारोबार यात। म्हिगः दकलय् ४५,६२० कित्ता शेयर अप्वः मर्चेण्ट फाइनान्स कम्पनीया प्रमोटर शेयरया न्याये-मी जुल। स्टायण्डर्ड फाइनान्सया दकलय् अप्वः ३४,६०३ कित्ता शेयर न्याये-मी जूगु दुसा स्टायण्डर्ड चार्टर्ड बैंकं दांया ल्याखं दकलय् अप्वः छगू करोड झिंगुंगू लाख ख्वीछद्वः तकाया कारोबार याःगु दु। अथे हे शिखर वित्तीय संस्थां अप्वः कमे यायेत ताःलाःगु दु ।
