कांग्रेस मन्त्रीतय् कार्यव्यस्तताया कारणं मन्त्रिपरिषदया बैठक स्थगित
सत्ता साझेदार नेपाली कांग्रेसया मन्त्रीतय्सं प्रधानमन्त्री माधवकुमार नेपालं आह्वान यानादीगु मन्त्रिपरिषदया बैठकय् ब्वति कायेमफइगु जानकारी बिवं बुधवाः च्वनीगु धाःगु बैठक स्थगित जूगु दु ।
कांग्रेस पाखें सरकारय् सहभागी मन्त्रीतय्सं वीपी जयन्तीया लसताय् ग्वसाःग्वःगु थीथी ज्याझ्वलय् ब्वति कायेमाःगु धासें कार्यव्यस्तता क्यनेवं बैठक च्वनेमफुगु ख: । कांग्रेस मन्त्रीतय्सं मन्त्रिपरिषदया बैठकय् थःपिं ब्वति कायेमफइगु जानकारी प्रधानमन्त्री माधवकुमार नेपालयात बीवं बैठक स्थगित जूगु खः ।
थ्वस्वयां न्ह्यः बुधवाः सुथय् गुताः ईलय् च्वनीगु धाःगु मन्त्रिपरिषदया बैठक प्रधानमन्त्री माधवकुमार नेपाल ईलय् हे येँय् लिहां झायेमफेवं न्हिनय् निताः ईलय्या निंतिं क्वछिउगु खः ।
बुधवाः च्वनीगु बैठकय् उपराष्ट्रपतिया सपथ प्रकरण लगायत विषयलय् सहलह यायेगु ज्याझ्वः दयेकातःगु खः ।
