नेपाः एक चीन नीतिया पक्षय् : परराष्ट्रमन्त्री
परराष्ट्रमन्त्री सुजाता कोइरालां नेपाः एक चीन नीतिया पक्षय् दुगु खँ धयादीगु दु । वयेकलं तिब्बतयात नेपालं चीनया हे अविच्छिन्न अंगया कथं कयावयाच्वंगुलिं नेपालय् चीन विरोधी गतिविधि जुइमबीगु प्रतिबद्धता प्वंकादिल ।
चीन भ्रमणया झ्वलय् बुधवाः बेइजिङय् चाइना इन्स्टिच्युट फर इन्टरनेसनल स्टडिजं नेपाः व चीन दथुइया स्वापू बारे याःगु ज्याझ्वलय् वयेकलं थ्व प्रतिबद्धता प्वंकादीगु खः ।
वयेकलं जनआन्दोलनया राजनीतिक परिवर्तन लिपाः देय् आर्थिक रुपान्तरणय् लगेजुयाच्वंगु धयादिसें न्हूगु विमानस्थल निर्माण, प्यसः मेघावाटया जलविद्युत आयोजना, रेल्वे व सतक सञ्जाल विस्तारया निंतिं छगू अर्ब डलरया आर्थिक ग्वाहालि यायेत थम्हं चिनिया नेतृत्वयात इनाप यानाःगु धयादिल ।
परराष्ट्रमन्त्री कोइरालां नेपालय् चिनिया लगानीकर्तातय्त लगानीया निंतिं आमन्त्रित यासें विदेशी लगानीकर्तातय् निंतिं विशेष आर्थिक क्षेत्र दयेकेगु योजना दुगु धयादिल । नेपालय् जलविद्युत क्षेत्रय् लगानीया विशेष अवसर दुगु नं वयेकलं उगु ज्याझ्वलय् धयादिल ।
(किपा सौजन्य : परराष्ट्र मन्त्रालय)
