प्रधानमन्त्री पाखें गर्भवती मिसाःया उद्धार
जोखिमय् लाःम्ह रुकुमया छम्ह मिसाःयात प्रधानमन्त्री माधवकुमार नेपालया पहलय् वासः याकेत येँय् हःगु दु ।
प्रधानमन्त्री स्वयमं आह्वान यानादीगु मन्त्रीपरिषदया बैठकय् मवंसें प्रधानमन्त्री नेपालं अत्याधिक रक्तश्रावया कारणं मचाः बुइके मफया गम्भीर अवस्थाय् लानाच्वंम्ह नीदँया गर्भवती कमला चन्दयात येँ हःगु खः । रुकुम जिल्ला अस्पतालय् भर्ना यानातःम्ह चन्दयात प्यघौ दुने थप उपचारया निंतिं येँ मयंकूसाः सीगु जानकारी चिकित्सकतय्सं बीवं पुलाम्ह जिविस सभापति खेमान खड्का, प्रमुख जिल्ला अधिकारी लगायतं नेपालगञ्जय् दुम्ह प्रधानमन्त्रीयात खबर ब्यूगु खः । उगु खँ न्यनेवं थः गयाजूगु हेलिकप्टरय् च्वनाः वयेक रुकुमय् वनाः गर्भवती चन्दयात कयाः येँ लिहांझायादीगु खः ।
स्वास्थ्य अवस्था गम्भीर जुम्ह चन्दयात आः येँया थापाथली च्वंगु प्रशुतीगृहलय् वासः याकातःगु दु ।
