नेप्से हाकनं कुहां वन
येँ (सन्ध्या टाइम्स)/म्हिगः कारोबार जूगु कम्पनीत मध्ये पीस्वंगू कम्पनिया कारोबारय् वःगु र्हासया लिसें छन्हु न्ह्यः सामान्य थहां वंगु नेप्से परिसूचक नं कुहां वंगु दु। वाःया न्हापांगु न्हि सामान्य सुधार जुयाः २ अंकं ५ दशमलव शून्य ४ अंकं कुहां वयेवं समग्र नेप्से परिसूचक ६५७ दशमलव ५३ अंकय् थ्यन ।
नेप्सेया लिसे कारोबार जूगु दक्वं उपसूचकय् नं र्हास वयेवं सेन्सेटिभ १ दशमलव ४५ अंक व फ्लोट शून्य दशमलव ४४ अंकं कुहां वःगु दु। लगातार कुहां वयाच्वंगु शेयर बजाःया कारणं छखे थुकी लगानी यायेत मनूत ग्यानाच्वंगु दुसा मेखे थकया लगानीकर्तातय् दथुइ नं न्हिथं निराशा ब्वलनाच्वंगु दु ।
नेप्सेय् जूगु म्हिगःया कारोबारय् दकलय् अप्वः विकास बैंक समुहया उपसूचक ६ दशमलव ६६ अंकं कुहां वयाः ६८८ दशमलव ६१ अंकय् थ्यंगु दु। वयां लिपा वाणिज्य बैंक समुह ५ दशमलव ८१ अंकं कुहां वयेवं ६७३ दशमलव ५१ अंकय् थ्यंगु दु। फाइनान्स समुह ३ दशमलव ९३ अंकं कुहां वयाः ६५२ दशमलव ३७ अंकय्, विमा समुह ३ दशमलव ३३ अंकं कुहां वयाः ६२९ दशमलव शून्य २ अंकय् व जलविद्युत समुह २ दशमलव १३ अंकं कुहां वयाः ८५३ दशमलव ५९ अंकय् थ्यंगु दु ।
म्हिगःया कारोबारय् नं नेप्से कुहां वंगुया मू कारण वाणिज्य बैंक समुहया कारोबारय् वःगु र्हास हे जुल ।
म्हिगः नं ख्वीगुंगू कम्पनीया शेयर कारोबार जूगु खःसां दांया ल्याखं छन्हु न्ह्यःया कारोबारय् स्वयां कुहां वःगु दु। छन्हु न्ह्यः झिंछगू करोड तकाया कारोबार जूगु खःसा म्हिगः छगू लाख नीद्वः खुसः व ख्वीन्हय्गू कित्ता शेयर न्याये-मी जुयाः गुंगू करोड चय्प्यंगू लाख व न्याछद्वः तका दांया कारोबार जुल ।
नविल बैंकं दांया ल्याखं दकलय् अप्वः निगू करोड ख्वीगुंगू लाख नीन्हय्द्वः तकाया कारोबार यात। म्हिगः दकलय् ४५,६२० कित्ता शेयर अप्वः मर्चेण्ट फाइनान्स कम्पनीया प्रमोटर शेयरया न्याये-मी जुल ।
स्टायण्डर्ड फाइनान्सया दकलय् अप्वः १३,५९० कित्ता शेयर कारोबार जूगु दुसा कारोबार जूगु मध्ये नविल बैंकया प्रमोटर शेयरय् प्रति कित्ता ५२/- तका थहां वंगु दुसा विराटलक्ष्मी विकास बैंकया शेयरय् प्रति कित्ता ६३/- तका कुहां वःगु दु। कारोबार जूगु कम्पनी मध्ये दकलय् नविल बैंकं दकलय् अप्वः निगू करोड न्यय्प्यंगू लाख स्वीस्वद्वः तका दां कारोबार याःगु दु ।
