संविधान निर्माण ईलय् हे जुइगु प्रधानमन्त्रीया दाबी
प्रधानमन्त्री माधवकुमार नेपालं दलत दथुइया सहमतियात कायम यासें निर्धारित ई दुने हे संविधान निर्माण जुइगु दाबी यानादीगु दु ।
कंचनपुरया महेन्द्रनगरय् मंगलवाः नेपाल शिक्षा यात्राया उल्लेज्या यानादिसें प्रधानमन्त्री नेपालं लिप्पांगु ईलय् दलत दथुइ खनेदगु असमझदारीया कारणं ईलय् हे संविधान निर्माण मजुइलाः धकाः अशंका अप्वयाच्वंगु धयादिसें याकनं हे सहमति कायम जुया संविधान निर्माण ईलय् हे जुइगु खँ धयादिल । वयेकलं व्यवस्थापिका संसद अवरुद्ध जुसां संविधानसभा सुचारु जुयाच्वंगु खँ न्ह्यथंनादिसें संविधान निर्माण जुइगुलि थः विश्वस्त जूगु धयादिल ।
देशय् स्थायित्व कायम यायेत सहमति कथं न्ह्यावयनेत सरकार सफल जूगु धयादिसें वयेकलं सरकारया सच्छिन्हुलय् सशस्त्र संघर्षया नांमय् अस्थिरता ब्वलंकेगु कुतः याइपिंत सरकारं नियन्त्रय् कयाःगु धयादिल । वयेकलं देशय् हिंसा ब्वलंकिपिं सुयात नं सरकार मत्वतीगु ख्याच्वः नं बियादिल ।
वयेकलं गुणस्तरीय शिक्षा बिना विकास सम्भव मजूगुलिं देयन्यंकया निगू लाख खुइद्वं मस्तय् निंतिं स्कूलय् ब्वनेदइगु ह्वताः चूलाकेत सरकार गम्भीर जूगु धयादिल । प्रधानमन्त्रीं महेन्द्रनगरय् उल्लेज्या यानादिधुंका न्ह्याःगु 'शिक्षाया निंतिं नेपाल यात्रा' पूर्वया झापा, काँकरभिट्टा, भद्रपुर, इटहरी, धरान, विराटनगर, इनरुवा, राजविराज, लाहान, जनकपुर, वीरगञ्ज जुया चितवन थ्यंका: पश्चिमपाखें व:गु पुच: नाप शिक्षाया सन्देश न्यंकुसें येँय् वयाः क्वचाइगु ज्याझ्वः दु ।
उखे सरकारया सार्वजनिक ज्याझ्वः बहिष्कारया घोषणा याःगु एकीकृत नेकपा (माओवादी)या कार्यकर्तातय्सं प्रधानमन्त्रीया उगु ज्याझ्वलय् नं हाकूगु ध्वाँय् क्यंगु खः ।
