संकल्प प्रस्तावय् सहलह जुइमाः : पोखरेल
सत्तारुढ नेकपा (एमाले)या महासचिव ईश्वर पोखरेलं राष्ट्रपति डा. रामवरण यादवं ल्ह्वंगु पलाःया बारे प्रमुख प्रतिपक्षी दल एकीकृत नेकपा (माओवादीं) संसदय् दर्ता याःगु संकल्प प्रस्तावय् सहलह जुइबीमाःगु खँ धयादीगु दु ।
रिपोटर्स क्लबं मंगलवाः येँय् याःगु छगू साक्षात्कार ज्याझ्वल् महसचिव पोखरेलं थःगु बिचाः प्वंकेगु अधिकार दक्वसिकें दुगुलिं संकल्प प्रस्तावय् सहलह जुइमाः धयादिल । वयेकलं संकल्प प्रस्तावय् सहलह यानाः उकीयात मंकाः प्रस्ताव नं दयेकेफइगु खँ धयादिल ।
आःया अवस्थाय् एमाले नेतृत्वया सरकारया विकल्प मदुगु दाबी यानादिसें वयेकलं मओवादीयात नं वर्तमान सरकारय् ब्वति कयाः थुकीयात राष्ट्रिय सरकार दयेकेमाःगु धयादिल । माओवादीं सरकारया नेतृत्व याःगु ईलय् योग्यता न्ह्यब्वये मफुगुलिं सरकार त्वतेमाःगु धयादिसें वयेकलं हानं माओवादीं सरकारया नेतृत्व यायेमफइगु बिचा: प्वंकादिल ।
