परराष्ट्र मन्त्री चीन झाल
येँ (सन्ध्या टाइम्स)/ परराष्ट्र मन्त्री सुजाता कोइराला खुन्हुयंकंया चीन भ्रमणया झ्वलय् उखे झाल। थौं सुथय् एयर चाइनाया विमानं वय्कः उखे झाःगु खः। मन्त्री कोइराला चिनियाँ समकक्षी याङ चेइचीया ब्वनाय् चीन झाःगु खः।
मन्त्री कोइरालां चीन भ्रमणया झ्वलय् नेपाःया सुरक्षास्थिति, नेपालय् जुयाच्वंगु चीन विरुद्धया गतिविधि, नेपाःया सुरक्षा सहयोग व सेनायात माःगु सुरक्षा उपकरणया लिसें निगू पक्षीय हितया बारे नं सहलह यानादीगु ज्याझ्वः दु ।
भ्रमणया झ्वलय् चीनं नेपाःया पोखराय् दयेके धाःगु अन्तर्राष्ट्रिय विमानस्थल, येँया थीथी थासय् दयेकीगु आकासे ताँ व स्वनिगःया फोहोर व्यवस्थापन आदिया सम्झौताय् हस्ताक्षर याये फइगु खँ धाःगु दु ।
भ्रमणया झ्वलय् मन्त्री कोइरालां नेपाःया प्रधानमन्त्री माधव नेपालं याकनं यानादीत्यंगु चीन भ्रमणया ज्याझ्वः नं मिले यानादी ।
अथे हे चीनया एक्जिम बैंक मार्फत नेपाःयात बीगु ९० अर्ब बराबरया वित्तीय ग्वाहालि बारे नं सहलह याइगु ज्याझ्वः दु।
चीन भ्रमणया झ्वलय् वय्कलं बिहिवाः चिनियाँ विदेश मन्त्रीयात नापलाइगु ग्वसाः दुसा राष्ट्रपति हु जिन्ताओयात नं नापलाये फइगु खँ धाःगु दु ।
वय्कलं म्हिगः प्रधानमन्त्री माधव नेपाल व प्रधानसेनापति छत्रमान गुरुङयात नं नापलानाः भ्रमण बारे खँल्हानादीगु खः ।
