यलया गांगामय् नेवाः संघया प्रशिक्षण
यल (सन्ध्या टाइम्स)/नेपाल लोकतान्त्रिक नेवाः संघ, यल जिल्ला कमिटीया ग्वसालय् यलया सुनाकुठी, थेचो व धापाखेल गामय् वंगु भदौ २० गते शनिवाः नेवाः स्वशासनया बारे छगू मंकाः प्रशिक्षण व अन्तर्क्रिया ज्याझ्वः जुल।
ज्याझ्वलय् मू वक्ता लोकतान्त्रिक नेवाः संघया केन्द्रीय नायः सानुराजा शाक्यं संघीय व्यवस्थाय् नेवाः प्रदेश, नेवाः आन्दोलन बारे ध्वाथुइकेगुया लिसें नेवाःतय्त गुकथं नेवाः प्रदेश सुनिश्चित जुइमाः धकाः ध्वाथुइकेगु ज्या जूगु खः।
संघया केन्द्रीय न्वकु व नेवाः स्वायत्त प्रदेश कमिटीया नायः हरिकृष्ण व्यञ्जनकारं नेवाः स्वायत्त राज्य मंकाः संघर्ष समितिया गतिविधि बारे नुगःखँ प्वंकादीगु खः। अथे हे प्रशिक्षक कथं झाःम्ह नेवाः संघया केन्द्रीय दुजः व यल इन्चार्ज न्हुच्छेलाल महर्जनं नेवाः प्रदेशया आवश्यकता व नेवाः स्वशासन बारे खँ तयादीगु खः। मेम्ह पाहां सुनाकुठीया ज्ञानभक्त महर्जनं थःपिं नेवाः जूगु कारणं हे अपहेलित जुइमाल धइगु बारे थःगु अनुभव कनादीगु खः ।
सभाया नायः नेवाः संघ यलया नायः निरकेशरी श्रेष्ठं नेवाः दुने नेवाः मिस्त अझं लिउने हे लानाच्वंगुलिं नेवाः आन्दोलनय् नेवाः मिस्त नं न्ह्यःने वयेमाःगु बिचाः प्वंकादिल ।
