यँयाः थौं क्वचाइ,यःसिं कन्हय् क्वःथली
येँ (सन्ध्या टाइम्स)/येँय् च्यान्हु तक न्ह्याइगु यँयाः जात्रा थौं क्वचायेत्यंगु दु। थौं कुमारी नापं गणेश व भैरवया रथ येँया थःनेपाखेया छगू लागा चाःहीकाः जात्रा क्वचायेकी। थौंया कुमारी यात्रायात नानिचायाः धाइ। थौं कुमारी साले सिधयेकाः राष्ट्रप्रमुखया हैसियतं राष्ट्रपति डा. रामवरण यादव कुमारी छेँय् झायाः कुमारीया ल्हातं सिन्हः ती। थगुने नानिचायाः कुन्हु आन्दोलन जुयाः याः तकं मन्याःगु खःसा राष्ट्रपतिं नं कुमारीया ल्हातं सिन्हः ती मखंगु खः ।
उखे साइत मदुगु कारणं थौं हे बहनी नानिचायाः क्वचायेवं क्वःथलेमाःगु यःसिं धाःसा कन्हय् सुथय् जक क्वःथलीगु जूगु दु। केन्द्रीय मानन्धर संघपाखें प्राप्त जानकारी कथं कन्हय् सुथय् ४.४५ बजे यःसिं क्वःथलीगु ज्याझ्वः दु ।
