'सरकार अल्पमतय् लायेधुंकल'
एकीकृत नेकपा (माओवादी)या अध्यक्ष पुष्पकमल दाहाल 'प्रचण्डं' वर्तमान सरकार अल्पमतय् लायेधुंकूगु धयादिसें माओवादी नेतृत्वया सरकार याकनं हे गठन जुइगु दाबी यानादीगु दु ।
मंगलवाः नेपालगञ्ज विमानस्थलय् संचारकर्मीत नाप खँल्हाबंला यानादिसें अध्यक्ष प्रचण्डं राष्ट्रपतिया विषयलय् माओवादीं संसदय् दर्ता याःगु संकल्प प्रस्ताव बारे सहलह यायेमबीगु धइगु हे थ्व सरकार अल्पमतय् लाःगुया बल्लागु प्रमाण जूगु धयादिल । मेगू दलतय्सं संकल्प प्रस्तावया पलेसा महाअभियोग प्रस्ताव ह्येत माओवादीयात हाथ्या बियाच्वंगुयात वयेकलं बेइमानीया संज्ञा बियादिल । वयेकलं तत्कालिन प्रधानसेनापतिया विषयलय् राष्ट्रपतिं ल्ह्वंगु पलाः मिभंकुतल्ले संसद चलेजुइ मबीगु धयादिल ।
माओवादीया भेरी-कर्णाली राज्य समितिं विरेन्द्रनगरय् याःगु सभायात सम्बोधन यानाः लिहांवयेगु झ्वलय् नेपालगञ्ज विमानस्थलय् संचारकर्मीत नाप खँल्हाबंला यानादिसें वयेकलं पुलांम्ह प्रधानसेनापति रुकमांग कटवालयात 'समान्ती दलाल' जूगु द्वपं बियादिल । वयेकलं कटवालया इनाप कथं कांग्रेस व एमालें राष्ट्रपतियात मदुगु अधिकार प्रयोग याकाः देशय् अस्थिता उत्पन्न याःगु धयादिल ।
