मन्त्रीयात हाकूगु ध्वाँय् क्यंपिंत लाठीचार्ज
सूचना व संचारमन्त्री शंकर पोखरेलयात स्याङ्जाय् हाकूगु ध्वाँय् क्यंपिं एकीकृत नेकपा (माओवादी)या कार्यकर्तातय्त प्रहरीं लाठीचार्ज याःगु दु ।
रेडियो स्याङ्जाया उल्लेज्या यायेत मंगलवाः स्याङ्जाया सदरमुकाम पुतलीबजार थ्यंकादिम्ह मन्त्री पोखरेलयात माओवादीया कार्यकर्ताततय्सं जिल्लाय् दुहांवेयत निषेध यासें हाकूगु ध्वाँय् क्यंगु खः । नाराबाजी यानाच्वंपिं माओवादी कार्यकर्तातय्त प्रहरीं लाठीचार्ज याःगु खसाः उकी लानाः स्वम्ह प्रदर्शनकारीत घाःपा जूगु दु । लाठीचार्जय् लानाः अखिल क्रान्तिकारीया जिल्ला अध्यक्ष सुभाष पौडेल सहित स्वम्ह घाःपा जूपिंत स्थानीय अस्पतालय् वाःस याकातःगु दु ।
प्रहरीया कथं माओवादी कार्यकर्तातय्सं मन्त्री पोखरेलयात सुरक्षा बीत च्वनाच्वंपिं प्रहरीया गाडीइ अप्पां क्येकूगुलिं लाठीचार्ज यायेमाःगु खँ धाःगु दु ।
थ्वस्वयां न्ह्यः मन्त्री पोखरेलयात मंगलवाः सुथय् पोखराया लेकसाइडय् नं माओवादी कार्यकर्तातय्सं हाकूगु ध्वाँय् क्यंगु खः ।
