वर्तमान सरकार सभासदत न्याना गठन जूगु यादवया द्वपं
मधेशी जनअधिकार फोरमया अध्यक्ष उपेन्द्र यादवं वर्तमान सरकार सभासद न्याय्-मीगु व दलतय् कुचाथला निर्माण जूगु द्वपं बियादीगु दु ।
जंनसंचार अभियानं सोमवाः येँय् याःगु ज्याझ्वलय् न्ववानादिसें अध्यक्ष यादवं वर्तमान सरकारया सच्छिन्हु उपलब्धिहीन जूगु दाबी यानादिल । वयेकलं एमाले नेतृत्वया सरकार परराष्ट्र सम्बन्ध, महंगी नियन्त्रण, शान्ति-सुरक्षा लगायत विषयलय् गम्भीर मजूगु द्वपं बियादिल ।
सत्तारुढ दलत दथुइया खिचातानीया कारणं हे वर्तमान सरकार संकटय् लाःगु दाबी नं अध्यक्ष यादवं उगु ज्याझ्वलय् यानादिल । वयेकलं संविधान सभाया दकलय् तःधंगु दल माओवादी सरकार पिने वनेमाःगु लज्जास्पद जूगु टिप्पणी यानादिल ।
अथेहे सहमतिया आधारय् न्हूगु राष्ट्रिय सरकार याकनं निर्माण जुइगु धयादिसें अध्यक्ष यादवं माओवादी लडाकूया समायोजन व शान्ति प्रकृयायात तार्किक निष्कर्षय् मथ्यंकूतल्ले संविधान निर्मान जुइ मफइगु दाबी यानादिल ।
