प्रधानमन्त्री व संविधानसभा अध्यक्ष दथुइ खंल्हाबंला
संविधान निर्माण व अवरुद्ध संसद सूचारु यायेगु विषयलय् संविधानसभाया अध्यक्ष सुवासचन्द्र नेम्वाङ व प्रधानमन्त्री माधवकुमार नेपाल दथुइ खँल्हाबंला जूगु दु ।
सोमवाः प्रधानमन्त्री निवास बालुवाटारय् जूगु खँल्हाबंलाय् सभामुख नेम्वाङं प्रधानमन्त्री नेपालयात संविधान निर्माण व अवरुद्ध संसद सूचारु यायेगु विषयलय् सरकारया ध्यानाकर्षण याकूगु खः । कार्यतालीका कथं निर्धारित ईलय् संविधान निर्माणया ज्या जुइमफुगु व दलत दथुइ खनेदुगु असमझदारीया विषयलय् अध्यक्ष नेम्वाङं प्रधानमन्त्री नेपालयात च्यूताः प्वंकादीगु खः ।
अथेहे संविधान निर्माणया निंतिं मुख्य समितिलय् दलत दथुइ सहमति जुइमफयाच्वंगु ईलय् सभामुख नेम्वाङं थुकी गम्भीर जुइत प्रधानमन्त्री समक्ष इनाप यानादीगु खः । नापं सभामुखं लगातार व्यवस्थापिका संसदया बैठक अवरुद्ध जुयाच्वंगुलिं जनताय् नकारात्मक लिच्वः लाःगु पाखे नं प्रधानमन्त्री समक्ष च्यूता प्वंकादीगु खः ।
