सेवासुविधा कटौती प्रति सत्तारुढ मधेशी दलतय् विरोध
सत्तारुढ मधेशवादी दलतय्सं पद निष्कृण जुयादिम्ह उपराष्ट्रपति परमानन्द झाया सेवा सुविधा कटौती यायेगु सरकारया पलाःया विरोध याःगु दु ।
सोमवाः सिंहदरवारय् च्वंगु स्वंगू मधेशवादी दलत मधेशी जनअधिकार फोरम (लोकतान्त्रिक), तराई-मधेश लोकतान्त्रिक व सदभावना पार्टीया शीर्ष नेतातय् बैठकं उपराष्ट्रपतिया सेवासुविधा कटौती यानाः सरकारं अपमानजनक व्यवहार क्यंगु धासें खेद प्रकट याःगु खः ।
सिंहदरवारय् च्वंगु सदभावना संविधान सभाया ज्याकूथी जूगु बैठकय् उमिसं उपराष्ट्रपतिया सेवासुविधा कटौतीया विरोध यासां वर्तमान गठबन्धनय् छुं नं असर मलाइगु खँ धाःगु दु । सपथ प्रकरणया समस्या समाधान यायेत संविधान संशोधन यानाः निकास पिकाये माःगु बारे माओवादी लगायत दलत नाप सहलह यायेगु निष्कर्ष पिकाःगु दु ।
सरकारं हःगु विशेष सुरक्षा नीतिं मधेशी जनताय् दुरुपयोग जुइगु धासें उकी सरकारया ध्यानाकर्षण याकेगु नं निर्णय याःगु दु । पशुपतिलय् पुजारीयात या:गु आक्रमणया नं विरोध यासें धार्मिक सदभाव स्यंकेमबीत दक्वं सचेत जुइत इनाप याःगु दु ।
