समुद्री लँपुं अमेरिका वनेत्यंपिं २५ नेपाःमि एलसाल्भाडोरय् ज्वन
येँ (सन्ध्या टाइम्स)/ इक्वेडरं एलसाल्भाडोर जुयाः अमेरिका वनेत्यंपिं नीन्याम्ह नेपाःमियात एलसाल्भाडोरया सामुन्द्रिक नौसेनां प्रशान्त महासागरय् ज्वंगु दु। इक्वेडरया मान्ता बन्दरगाह जुयाः छवाः न्ह्यः डुंगाय् च्वनाः एलसाल्भाडोर वयाच्वंबलय् उमित ज्वंगु खः ।
डुंगाय् नेपाःमिया लिसें नीन्याम्ह बंगलादेशी, नीछम्ह इरिट्रीयाली व न्याम्ह इक्वेडरया नागरिक च्वनावःगु खः।
उमित एलसाल्भाडोरया समुन्द्र सिथ स्वयां ८० किमि तापाक ज्वंगु खँ नौसेनाया क्याप्टेन माक्सिलिआनो कोराडां धाःगु दु।
उगु डुंगाय् च्वनाः वनाच्वंपिंके गुगुं नं कथंया भ्वं नं मदुगु खँ कोराडां धाःगु दु। इक्वेडरवासी बाहेक मेपिं फुकसितं लित छ्वयेगु खँ नं वं धाःगु ।
ज्वंपिं इक्वेडरवासीतय्त धाःसा अवैध रुपं आप्रवासी ल्ह्ययेगु ज्या याःगु द्वपनय् कारवाही याइगु जूगु दु ।
ज्वंपिं नेपाःमित गनं वःपिं खः धइगु खँ सी मदुनिसा थुकथं समुन्द्री लँपु जुयाः सुं नं नेपाःमि अवैध रुपं अमेरिका वनेत्यंगु धाःसा थ्वहे न्हापांखुसी जुइमाः धाःगु दु ।
