राष्ट्रपतियात छुं जूसा छु याये ?
येँ (सन्ध्या टाइम्स)/छुं भवितव्य जुयाः राष्ट्रपति डा. रामवरण यादवयात छुं जुल धाःसा वय्कलं कयातःगु राष्ट्रप्रमुखया पद सुयात बीगु? थौंकन्हय् देय्या कानून ख्यलय् थ्व न्ह्यसः पिहां वःगु दु ।
सामान्यतया थज्याःगु अवस्थाय् राष्ट्रपतिया कार्यभार उपराष्ट्रपतियात बीगु खः। तर थौंकन्हय् देय्या उपराष्ट्रपतिया पद 'निष्त्रि्कय' जुयाच्वंगु दु। खय् भासं शपथ ग्रहण मयाः धासें सर्वोच्च अदालतं उपराष्ट्रपति परमानन्द झाया पद 'निष्त्रि्कय' याना बिउगु खः। अथे धकाः वय्कः सेवां पूर्ण रुपं पिने नं लाःगु मदुनि। तर पद निष्त्रि्कय जुल धाःगुलिं उपराष्ट्रपति नं मखुत। थज्याःगु अवस्थाय् उपराष्ट्रपतिया पद छु जुइ धइगु संवैधानिक न्ह्यसः पिहां वःगु दु ।
आः वय्कःयात पदं पूर्ण रुपं विदा बीगु लागिं सर्वोच्चं हे हानं मेगु आदेश जारी यायेमाःगु खः लाकि संसदं छुं भूमिका म्हितेमाःगु खः धइगु न्ह्यसः नं पिहां वःगु दु। संसदं भूमिका म्हितेगु खःसा व राजनीतिक भूमिका जुइगु व राजनीतिक रुपं धाःसा उपराष्ट्रपतियात चीकेगु अवस्था थौंया इलय् मदुगु खँ थन धयाहःगु दु ।
