बौद्ध महिला संघया तःमुँज्या
येँ (सन्ध्याटाइम्स)/बौद्ध महिला संघया झिंस्वक्वःगु तःमुँज्या बुद्धविहार भृकुटी मण्डपय् छगू ज्याझ्वःया दथुइ जुल। श्रद्धेय भन्ते कुमार काश्यप महास्थविरया सभापतित्वय् जूगु उगु ज्याझ्वलय् संघया अध्यक्ष बासन्तदेवी बज्राचार्यं लसकुस यानादीगु खःसा चन्द्रदेवी शाक्यं संघया वार्षिक प्रतिवेदन न्ह्यब्वयादीगु खः। वार्षिक प्रतिवेदनय् संविधान निर्माण थेंज्याःगु महत्वपूर्ण ज्याय् बुद्धधर्म व मेमेगु धर्मयात नं दुथ्याके माःगु लगायतया झिगू बुँदे माग धर्मोदय सभा समक्ष न्ह्यब्वःगु दु ।
तःमुँज्यां सुमना स्वास्थ्य उपचार कोषय् डा. केशरीलक्ष्मी मानन्धर, स्वास्थ्य संयोजक सरिता तुलाधर, नेपाल थेरवादी बौद्ध संग्रहालय नीस्वनेत सरोज मानन्धर संयोजक जुयादीगु छगू समिति व छन्हुया विपश्यना ध्यान, बाल शिविर व परियत्ति शिक्षा न्ह्याकेत नानीमैंया मानन्धर संयोजक जुयादीगु समिति नं स्वंगु दु। अथे हे मीरा ज्योति संयोजक जुयादीगु आर्थिक संकलन समिति व गुरुमांपिनि लागिं शिक्षालय नीस्वनेत बासन्ती वज्राचार्यया संयोजकत्वय् खुगू समितित नीस्वंगु दु ।
तःमुँज्यां न्हूपिं सल्लाहकार कथं प्रा. डा. बज्रराज शाक्य, आर. बी. बन्ध (राजभाई शाक्य), लक्ष्मीदास मानन्धर व सुवर्ण शाक्य ल्यःगु दु। अथे हे धम्मानुशासक कथं उप संघनायक भिक्षु अश्वघोष महास्थविर, भिक्षु धम्ममूर्ति व अनागारिका ञानवतियात नियुक्त यायेगु क्वःछित।
सहकोषाध्यक्ष मय्जु गंगा श्रेष्ठं दछिया आयब्यय विवरण व आर्थिक दँया बजेट नं न्ह्यब्वःगु तःमुँज्याय् उपाध्यक्ष सुजाता मानन्धरं नं न्ववानादीगु खः ।
