नेप्से थहां वन
येँ (सन्ध्या टाइम्स)/नेप्से थहां कुहां जुइगुली वाणिज्य बैंकया प्रमुख भूमिका दयाच्वनीगु खःसां म्हिगःया कारोबार धाःसा वाणिज्य समुहलं छुं उल्लेख्य भुमिका म्हिते मफुत। अप्वः धइथें वाणिज्य समुहया म्हिगः नं कारोबार कुहां वंसां नेप्से धाःसा थहां वंगु दु। अथेखःसां म्हिगः नेप्से थहां वनेगुली स्टायण्डर्ड चार्टर्ड बैंकं प्रमुख भूमिका म्हितूगु खनेदत। वाणिज्य समुहया बैंकत मध्ये स्टायण्डर्ड छगूया जक दकलय् अप्वः प्रति कित्ता शेयरय् ४५ तका/- थहां वंगु दु ।
थ्व ल्याखं नेपाल स्टक एक्सचेन्जय् थ्व वालय् कारोवार शुरु जूगु न्हापांगु न्हि हे नेप्से २ दशमलव १७ अंकं थहां वनाः ६६२ दशमलव ५७ अंकय् थ्यंगु दु। अथे हे म्हिगःया कारोबारय् सेन्सेटिभ नं शून्य दशमलव २३ अंकं थहां वंगु दुसा फ्लोट छगू जक शून्य दशमलव शून्य ४ अंकं कुहां वल ।
म्हिगः कारोबार शुरु जुइवं नेप्से थहां वंगु खःसां वयां घौछि लिपा हाकनं कुहां वंगु खः। थ्व क्रमं बजाः बन्द मजूतले निरन्तरता काःगु खः ।
स्टायण्डर्ड चार्टर्ड बाहेकं मेमेगु बैंकया शेयर भाः कुहां वयेगु झ्वलय् लक्ष्मी बैंक दकलय् अप्वः ८३/- व एभरेष्ट बैंकया ४४/- तका उच्च रुपं कुहां वःगु खः ।
कारोबार जूगु उपसूचकय् वाणिज्य समुह शून्य दशमलव ३७ अंकं कुहां वयाः ६७९ दशमलव ३२ अंकय् थ्यन। जलविद्युत समुह नं १ अंकं कुहां वयाः ८५५ दशमलव ७२ अंकय् थ्यंगु दुसा विमा समुह नं ४ दशमलव १२ अंकं कुहा वयेवं थुगु समुह ६३२ दशमलव ३५ अंकय् थ्यंगु दु ।
मेखे विकास बैंक समुह ५ दशमलव १४ अंकं थहां वनाः ६९५ दशमलव २७ अंकय् थ्यंगु दुसा फाइनान्स समुह नं २ दशमलव ७३ अंकं थहां वनाः ६५६ दशमलव ३ अंकय् थ्यन। होटल समुहया कारोबार जूसां छुं हिउपाः धाःसा वःगु मदु।
ताः ई लिपा कारोबार जूगु कम्पनीया ल्याः थहां वनाः म्हिगः ख्वीगुंगू कम्पनीया शेयर कारोबार जुल। थ्व ल्याखं म्हिगः छगू लाख न्हय्च्याद्वः गुसः गुइनिगू कित्ता शेयर न्याये-मी जुयाः झिंछगू करोड न्हय्प्यंगू लाख ख्वीछद्वः तका दांया कारोबार जुल ।
नविल बैंकं दांया ल्याखं दकलय् अप्वः निगू करोड ख्वीगुंगू लाख नीन्हय्द्वः तकाया कारोबार यात। म्हिगः दकलय् ४५,६२० कित्ता शेयर अप्वः मर्चेण्ट फाइनान्स कम्पनीया प्रमोटर शेयरया न्याये-मी जुल ।
