कोइराला नाप खंल्हाबंला यायेमखंक प्रधानमन्त्री लिहांवयेमाल

वर्तमान राजनीतिक घटनाक्रमया बारे सत्ता साझेदार दल नेपाल कांग्रेसया सभापति गिरिजाप्रसाद कोइरालानाप खँल्हाबंला यायेत झायादिम्ह प्रधानमन्त्री माधवकुमार नेपाल छुं हे सहलह यायेमखंक लिहांवयेमाःगु दु ।

प्रधानमन्त्री नेपाल न्हूपिं मन्त्रीतय् सपथ ग्रहण नापं सरकारया सच्छिन्हुया बारे सहलह यायेत कोइराला निवास महाराजगंज थ्यंकादीगु खः । तर कांग्रेस सभापति कोइराला म्हः मफुगु कारणं खँल्हाबंला जुइमफुगु खँ कोइराला निकट स्रोतं धाःगु दु । झिगू मिनेट तक पिया नं कोइराला नाप खँल्हाबंला यायेमखनेवं प्रधानमन्त्री नेपाल अनं लिहांझायादीगु खः ।

कांग्रेस सभापति कोइराला थः म्हाय् सुजाता कोइरालायात प्रधानमन्त्रीं उपप्रधानमन्त्री मदयेकूगु, मन्त्रीपरिषद बिस्तार, राजदूत नियुक्ति लगायत विषयलय् प्रधानन्त्री नाप असन्तुष्ट जुयाच्वनादीगु दु ।