रणवीर सेनाया प्रमुखयात नं ज्वन
डिफेन्स आर्मीया अध्यक्ष मैनालीयात येँ हल
तराईया सशस्त्र भूमिगत संगठन रणवीर सेनाया प्रमुख विनोद पाण्डेयात प्रहरीं ज्वंगु दु । गोप्य सूचनाया आधारय् मोरङ प्रहरीं आइतवाः बहनी विराटनगरं पाण्डेयात ज्वंगु खः । अथेहे प्रहरीं पाण्डेनाप दुपिं नवीन पाण्डे व सोनु लिम्बूयात नं ज्वंगु दु ।
प्रहरीं स्थानीय नवराज पोखरेलया छेँय् च्वनाच्वंगु ईलय् पाण्डेयात ज्वंगु खसाः पाण्डे नाप दुगु प्यंगू बोरा सकेटबम, कप्युटर, प्रिन्टर, मोटरसाइकल, प्यंगः मोबाइल व छपू पेस्ताल बरामद याःगु दु । अथेहे उपिं नाप दुगु थीथी कथंया बम दयेकीगु सामान नं बरामद याःगु दु ।
प्रहरी स्रोतया कथं सोमवाः थुकीया बारे पत्रकार सम्मेलन यानाः विस्तृत विवरण बीगु व उमित सार्वजनिक याइगु जूगु दु ।
अथेहे हिन्दू अधिराज्यया माग यासें थीथी थासय् हिंसात्कम ज्याय् संलग्न जुम्ह नेपाल डिफेन्स आर्मीया अध्यक्ष रामप्रसाद मैनालीयात प्रहरीं आइतवाः सनिलय् झापां येँ हःगु दु । येँ पाखें वंगु प्रहरीया स्पेसल टास्क फोर्सं अध्यक्ष मैनाली सहित प्यम्हेसित ल्वाभः सहित झापाया राजगढं आइतवाः ज्वंगु खः ।
