कैलालीइ बम विस्फोटय् लाना: स्वम्ह सित, न्याम्ह घाःपा
कैलालीया मालाखेती गाविस स्थित तेघरीलय् आइतवाः सनिलय् जूगु बम विस्फोटय् लनाः निम्ह मस्त नापं स्वम्ह सीगु दुसाः न्याम्ह घाःपा जूगु दु ।
तेघरी स्थित हर्क महतया छेँय् जूगु बम विस्फोटय् २२ दँया चक्रबहादुर विक, १३ दँया कविता बोहरा व ९ दँया मनीषा ओली सीगु खः । विक व बोहरा घटनास्थलय् मदुगु खसाः ओलीया अस्पतालय् वासः यानाच्वंगु ईलय् मदुगु खः ।
अथेहे बम विस्फोटय् लानाः ३८ दँया लालबहादुर बोहोरा, २८ दँया टेकबहादुर बोहोरा, ३ दँया सुदीप देउवा, ३० दँया लक्ष्मीदेवी देउवा व २० दँया विमलादेवी ओली घाःपा जूगु दु । घाःपा जुपिं न्याम्ह मध्ये स्वम्हेसिया अवस्था गम्भीर दुसाः उमित वासः याकेत नेपालगाजय् यंकूगु दु ।
जिल्ला प्रहरी ज्याकू घनगढीया कथं भगौडा आर्मी लाल बहादुर बोहरां हःगु बम आइतवाः सनिलय्या न्यातात्याः ईलय् महतया छेँय् विस्फोट जूगु खः । बोहरां बम गुकथं छ्यलीगु धकाः क्यनाच्वंगु ईलय् बम विस्फोट जूगु खः । बम गनं व छाय् हःगु धकाः प्रस्ट मजूगुलिं थुकीया थप अनुसन्धान जुयाच्वंगु जानकारी नं प्रहरीं ब्यूगु दु ।
