'जनताया ल्हातय् ल्वाभः हे नागरिक सर्वोच्चता'
एकीकृत नेकपा (माओवादी)या अध्यक्ष पुष्पकमल दाहाल 'प्रचण्डं' जनतायाय् ल्हातय् ल्वाभः दइगु हे नागरिक सर्वोच्चता जूगु खँ धयादीगु दु ।
संयुक्त जनआन्दोलन समिति नेपालं विराटनगरय् आइतवाः याःगु जनसभायात सम्बोधन यानादिसें अध्यक्ष प्रचण्डं ल्वाभःया क्वये जतना जुइमज्यूगु धयादिसें ल्वाभः जनताया ल्हातय् मवतल्ले लोकतन्त्र मवइगु दाबी यानादिल । वयेकल नागरिक सर्वोच्चताया मर्म हे ल्वाभः जनताया नियन्त्रणयय् दइगु धयादिल ।
राष्ट्रपति डा. रामवरण यादवं ल्ह्वंगु पलाखं जनता ल्वाभःया क्वये लाःगु धयादिसें माओवादी अध्यक्ष प्रचण्डं जनताया ल्हातय् ल्वाभः दयेमाःगु मान्यता ज्वना हे थः प्रधानमन्त्रीया पदं राजीनामा बिया जनतानाप जाना आन्दोलन यायेवयाःगु धयादिल ।
वयेकलं वीपी कोइरालां नं सेनायात लोकतान्त्रिककरण यायेमफुगु खँ न्ह्यथंनादिसें धयादिल, - 'लोकतन्त्रयात संस्थागत याये चाहेजूसा कांग्रेसं वीपीया खँ माने यायेमाल ।'
नेपाःलय् क्रान्ति व प्रतिक्रान्ति, लोकतन्त्र व निरंकुशत, जनताया वा ल्वाभःया सर्वोच्चता धइगु तःधंगु बहस जुयाच्वंगु धयादिल, - 'झी क्रान्ति लोकतन्त्र व जनताया निंतिं ल्वानाच्वनागु दु ।'
अथेहे आइतवाः किराँत जनराज्य आन्दोलन अन्तर्गत उदयपुरया सदरमुकाम गाइघाटय् जूगु जनसभायात सम्बोधन यानादिसें माओवादी उपाध्यक्ष डा. बाबुराम भट्टराईं राष्ट्रपति डा. रामवरण यादवं संविधानय् हे मदुगु अधिकार छ्यलाः पदीय जिम्मेवारीया दुरुपयोग याःगु द्वपं बियादिल ।
वयेकलं राष्ट्रपतिया असंवैधानिक पलाःयात समर्थन यानाः कांग्रेस व एमालें इतिहासय् हे दकलय् तःधंगु गल्ती याःगु धयादिसें थ्व सरकार याकनं क्वदला माओवादी नेतृत्वया राष्ट्रिय सरकार गठन जुइगु दाबी यानादिल ।
