सभासदतय् निर्णय व्यक्तिगत : गच्छदार

उपप्रधानमन्त्री व भौतिक योजना निर्माण मन्त्री विजयकुमार गच्छदारं वर्तमान सरकारयात ब्यूगु समर्थन थःगु पार्टीया न्ह्यम्ह सभासदतय्सं लितकाःगु निर्णययात व्यक्तिगत जूगु टिप्पणी यानादीगु दु ।

आइतवाः येँय् जूगु छगू ज्याझ्वलय् न्ववानादिसें मन्त्री गच्छदारं वर्तमान सरकारया विकल्प मालेमज्यूगु खँय् बः बियादिल । वयेकलं सरकारयात ब्यूगु समर्थन थः पार्टीया सभासदतय्सं लितकाःगु निर्णय पार्टीया मजूगु स्पष्ट यानादिसें उकीयात व्यत्तिगत निर्णय जूगु खँ धयादीगु दु ।

प्रधानमन्त्री माधवकुमार नेपालया विकप्ल मदुगु धयादिसें वयेकलं माओवादी नं थ्वहे सरकारय् वयेमाः धयादिल । वयेकलं यदि तःधंगु दलत छप्पं जुया सहमतिया आधारय् न्ह्या वनेमफुसाः मधेशवादी दलतय्सं नेतृत्व याइगु धयादिल ।