संविधान च्वयेगु ज्या थांग्राङ्ग
येँ (सन्ध्या टाइम्स)/ संविधान च्वयेगु ज्या न्ह्याकेत संविधानसभां दयेकातःगु कार्यतालिका हानं छक्वः संशोधन याइगु जूगु दु। संविधानसभाया आपालं विषयगत समितितय्सं थःपिनि प्रारम्भिक मस्यौदा तक हे तयार मयाःगु कारणं कार्यतालिका हानं संशोधन यायेमाःगु खः। विषयगत समितितय्त मस्यौदा तयार यायेत बियातःगु ई थौं क्वचायेत्यंगु दु ।
आः तक न्याक्वः संशोधन जुइधुंकूगु थ्व कार्यतालिकायात आः खुक्वःगु संशोधन यायेत्यंगु खः। थौं तकया दुने फुक्कं समितिया प्रतिवेदन वयेमाःगु खःसां संविधानसभाया मूल समिति संवैधानिक समिति लगायत मेगु प्यंगू विषयगत समितिं प्रारम्भिक प्रतिवेदन हे तयार मयाःनि ।
कार्यतालिकाया पुनः संशोधन बारे सहलह यायेत थौं संविधानसभा अध्यक्ष सुवास नेम्वाङ्गं थीथी पार्टीया प्रमुख सचेतकतलिसे वार्ता यायेत्यंगु दु। अथे हे वय्कलं थौं हे थीथी राजनीतिक पार्टीया प्रमुख नेतातलिसे नं सहलह ब्याकादीगु ज्याझ्वः दु ।
सूत्रतय्सं धाः कथं मूल समिति धयातःगु संवैधानिक समितिया अध्यक्ष माधव नेपाल प्रधानमन्त्री जू वनेवं उगु समिति निष्त्रि्कय जूगु खःसा उकिया लिच्वः कथं मेमेगु समितितय्सं नं ज्या याये मफुगु खः। थीथी विषयगत समिति मध्ये छगू समितिया ज्या सिमधयेकं मेगु समितिया शुरु जुइ मफइगु कारणं गुलिखे समितितय्सं थःपिनि ज्या याये मफयाच्वंगु खः ।
कन्हय् च्वनीगु कार्य व्यवस्था समितिया बैठकं कार्यतालिका हिलेगु प्रस्ताव याइगु ज्याझ्वः दु। तर जेठ १४ गते संविधान तयार जुइगु ज्याझ्वः धाःसा हिली मखु ।
