गिरिजाया असन्तुष्टि बारे कांग्रेसय् सहलह
येँ (सन्ध्या टाइम्स)/एमाले नेतृत्वया सरकार विरुद्ध कांग्रेस सभापति गिरिजा प्रसाद कोइरालां प्वंकादीगु असन्तुष्टियात कयाः थौं च्वनीगु कांग्रेस केन्द्रीय समितिया बैठकय् सहलह जुइगु जूगु दु ।
सभापति कोइरालां थः म्ह्याय् सुजाता कोइरालायात वर्तमान सरकारय् उपप्रधानमन्त्री दयेकेत याःगु प्रस्तावयात प्रधानमन्त्री माधव नेपालं स्वीकार मयायेवं सभापति कोइरालां सरकारप्रति असन्तुष्टि प्वंकादीगु खः। प्रम नेपालं उकियात अस्वीकार याःगु कारण धाःसा उपप्रम सम्बन्धी थ्व प्रस्ताव कांग्रेसपाखें संस्थागत रुपं मवःगुलिं खः ।
बैठकय् थ्वहे वइगु कार्तिक २३ गते सःते धाःगु महासमितिया बैठक स्थगित यायेत सभापति कोइरालां यानादीगु इनापयात कयाः नं सहलह जुइगु खँ धाःगु दु। विधान संशोधन, क्रियाशील सदस्यता व राज्य पुनर्संरचना समितिं तयार याःगु प्रतिवेदन बारें बैठकय् सहलह जुइगु खँ दु ।
