मनपा कर्मचारीतय् स्वास्थ्य परीक्षण
येँ (सन्ध्या टाइम्स)/ काठमाडौं महानगरपालिका व छत्रपाटी निःशुल्क चिकित्सालय दथुइ सम्झौता जूकथं वंगु भाद्र १७ गते छत्रपाटी निःशुल्क चिकित्सालयया सभाकक्षय् संस्थाया अध्यक्ष विजयबहादुर मालीया सभापतित्वय् जूगु समारोहय् स्वास्थ्य परीक्षण शिविर न्ह्यात। कर्मचारी प्रशासन विभाग प्रमुख शान्तराम पोखरेलं येँ महानगरपालिकाया कर्मचारीतय्गु स्वास्थ्य परीक्षण शुभारम्भ यानादिल ।
ज्याझ्वःया उलेज्या यानादिसें महानगरया ज्याय् ग्वाहालि याःगुलिं छत्रपाटी निःशुल्क चिकित्सालययात सुभाय् देछासें थज्याःगु ज्याझ्वःयात थप विस्तार याना वनेगु खँ कनादिल। ज्याझ्वःया उद्देश्ययात न्ह्यथनादिसें येँ महानगरपालिकाया जनस्वास्थ्य तथा सामाजिक विकास विभागया डा. बाबुराम गौतमं महानगरपालिकाबासीया स्वास्थ्य रक्षा यायेत खटे जुइपिं थ्व स्वास्थ्य कर्मचारीतय् स्वास्थ्य हे स्वस्थ मजुल धाःसा महानगरपालिकाबासीया स्वास्थ्यय् तकं प्रतिकुल लिच्वः लायेफुगुलिं थुगु ज्याझ्वः ताःलाकेत सकसितं इनाप यानादिल ।
ज्याझ्वःया सभापति संस्थाया अध्यक्ष विजयबहादुर मालीं छत्रपाटी निःशुल्क चिकित्सालयया मू उद्देश्य धइगु हे दां मदुगु कारणं वासः याये मखनाः सीमाःपिं सर्वसाधारण जनतायात सितिकं वासः यायेगु खः धयादिल। २०१३ सालय् झितका दांया पुँजीं शुरु जूगु थुगु संस्था थौं गुगु थासय् तक थ्यंगु खः थ्व फुक्कं संरचनाया विकासया श्रेय नं नेपाली जनताया सेवाय् समर्पित जुयाच्वंगु दु धासें अध्यक्ष विजयबहादुर मालीं आः कर्मचारी स्वास्थ्य कार्यक्रमय् सहकार्य यानागु कनादिल। ज्याझ्वलय् संस्थाया उपसभापति दिपककाजी पाण्डें लसकुस यानादीगु खः ।
