डिफेन्स आर्मीया प्रमुख ज्वन
येँ (सन्ध्या टाइम्स)/ स्वनिगः नापं पिने जिल्लाया थीथी थासय् बम मुइकेगु ज्याय् संलग्न जुया वयाच्वंगु नेपाल डिफेन्स आर्मीया अध्यक्ष आर.पी. मैनालीयात थौं प्रहरीं ज्वंगु दु। मैनाली नापं मेपिं प्यम्ह मनूयात नं ज्वंगु दु।
झापाया राजगढ धइगु थासं थौं सुथय् ११ बजेपाखे उमित ज्वंगु खँ प्रहरीं धाःगु दु। येँनं वंगु छगू विशेष प्रहरी पुचः व विराटनगर वंगु पुचः ज्वनाः उमित ज्वंगु खः। उमित शरणमति नापसं च्वंगु राजगढ धइगु थासय् च्वनाच्वंगु इलय् प्रहरीं ज्वंगु खः ।
येँया चर्चय् बम मुइकेगु ज्याय् थ्व पुचःया ल्हाः दुगु खँ अबलय् चर्चाय् वःगु खः। लिसें थ्वं विराटनगरया नं थीथी थासय् बम मुइकेगु ज्या याःगु खः ।
मैनाली बारे आः थप अनुसन्धान जारी जुयाच्वंगुलिं प्रहरीं थप विवरण धाःसा बिउगु मदुनि। थ्व पुचःयात जुजुवादी संगठन कथं कायेगु याः ।
