छवाःया कारोबार व नेप्से कुहां वल
येँ (सन्ध्या टाइम्स)/नेपाल स्टक एक्सचेन्जय् थ्व वालय् मुक्कं प्यन्हु जक जूगु शेयर कारोबारं छवाः समग्र नेप्से परिसूचक १० दशमलव ७५ अंकं कुहां वःगु दु। वाःया न्हापांगु न्हिया ६७१ दशमलव १५ अंकं शूर जूगु कारोबारय् अन्तिम न्हि ६६० दशमलव ४० अंकय् थ्यंकाः कारोबार बन्द जुल।
थ्व वालय् गुइगू कम्पनीया ४३७४ कारोबारं प्यंगू लाख ख्वीखुद्वः व स्वसः कित्ता शेयर न्याये-मी जुयाः स्वीप्यंगू करोड न्यय्प्यंगू लाख स्वीस्वद्वः तका दांया कारोबार जुल। वंगु वालय् ५८२० कारोबारं मुक्कं न्यय्छगू करोड नीन्हय्गू लाख नीनिद्वः तका दां बराबरया खुगू लाख चय्च्याद्वः व न्हय्सः कित्ता शेयर न्याये-मी जूगु खः ।
थ्व वालय् दांया ल्याखं जूगु कारोबारय् वंगु वालय् जूगु दांया कारोबारय् स्वयां ३२ दशमलव ६३ प्रतिशतया ल्याख र्हास वःगु दु ।
अथे हे थ्व वालय् 'क' वर्गया कारोबार मापन याइगु सेन्सेटिभ इन्डेक्स नं न्हापांगु न्हिया तुलनाय् ३ दशमलव ३५ अंकं कुहां वयाः १७३ दशमलव ६२ अंकय् थ्यंगु दु।
'क' वर्गय् लाःगु कम्पनीया जक थ्व वालय् नीस्वंगू करोड पीगू लाख तका दांया कारोबार जुल। थ्व नेप्सेय् जूगु कूल कारोबारया ६७ दशमलव ७५ प्रतिशत खः ।
थ्व वालय् दकलय् अप्वः दां स्वंगू करोड ख्वीनिगू लाख तका कारोबार याःगु आधारय् बैंक अफ काठमाण्डु, दकलय् अप्वः स्वीछद्वः कित्ता शेयर कारोबार जूगु आधारय् नेशनल हाइड्रो पावर व दकलय् अप्वः प्यसः व पीखुगू कारोबार बैंक अफ एशिया न्ह्यःने लाःगु दु ।
थ्व वालय् सिद्धार्थ बैंक व प्रिमियर फाइनान्सया बोनस शेयर व नेपाल डेभलपमेण्टएण्ड इम्प्लोइमेण्ट प्रमोशन बैंकया हकप्रद शेयर नेपाल धितोपत्र बोर्डय् सूचीकृत जुल ।
