दलतय्सं अपराधीतय्त संरक्षण यानाच्वंगु गृहमन्त्रीया द्वपं
गृहमन्त्री भीम रावलं राजनीतिक दलतय् दबाबया कारणं हे आपराधिक घटना म्हो जुइ मफुगु द्वपं बियादीगु दु ।
प्रेस चौतारी बाँकें आइतवाः नेपालगञ्जय् याःगु पत्रकार सम्मेलनय् मन्त्री रावलं अपराधीतय्त राजनीतिक संरक्षण यायेगु परिपाटीया अन्त्य मजुतल्ले समाजय् लुटपाट, चन्दा आतंक लगायत आपराधीक गतिविधित कायम हे जुइगु धयादिल । वयेकलं राजनीतिक दलतय्सं अपराधीतय्त संरक्षण यायेगु ज्या जुयाच्वंगुलिं उकीया न्युनिकरणया निंतिं दलतय्सं हे प्रतिबद्धता प्वंकेमाः धयादिल ।
कानुन विपरीत ज्या याइपिंत कानुनया दायराय् ह्येत सरकारं सुरक्षा विशेष नीति हःगु स्पष्ट यानादिसें गृहमन्त्री रावलं कानुनया दायारा स्वयां च्वये वनेत स्वइपिं न्ह्याम्हेसित जुसां कारवाही यायेगु ख्याच्वः बियादिल ।
शान्तिया विरोधीतय्सं सरकारया विशेष सुरक्षा नीतिया विरोध याःगु प्रति आपत्ति प्वंकादिसें सरकारं न्ह्याथे यानाः जुसां सुरक्षा नीति कार्यान्वयन यानाः त्वतेगु धयादिल ।
