राप्तीया यातायात बन्द

नेपाल यातायात राष्ट्रिय व्यवसायी महासंघ राप्तीं आह्वान याःगु यातायात बन्दया कारणं आइतवाः सुथंनिसें राप्ती क्षेत्रया जनजीवन प्रभावित जूगु दु ।

यातायात व्यवसायी महासंघं थीथी ईलय् तोडफोड जूगु व च्याकूगु सवारी साधनया क्षतिपूर्ति माग यासें राप्तीया यातायात बन्दया आह्वान याःगु खः । बन्दया कारणं राप्ती अञ्चलया दाङ, सल्यान, प्युठान, रोल्पा व रुकुमया छुं नं सवारी साधनत चलेजूगु मदुसाः थुकीं यानाः यात्रुत आवतजावत यायेत थाकूगु दु ।

थ्वहे दथुइ बन्दया अवज्ञा याःगु धासें यातायात व्यवसायीतय्सं तुलसीपुरय् प्यंग मोटरसाइकल व छगः ट्याक्टर नियन्त्रणय् काःगु दुसाः नारायणपुरय् निगः गाडी नियन्त्रणय् काःगु दु ।

व्यवसायी महासंघं क्षतिपूर्ति मब्यूसा अनिश्चितकालया निंतिं याताताय बन्द यायेगु ख्याच्वः ब्यूगु दु ।