फोरम लोकतान्त्रिकया न्ह्यम्ह सभासदतय्सं सरकारयात ब्यूगु समर्थन लितकाल
राजपां नं सरकारयात ब्यूगु समर्थन लितकाल
मधेशी जनअधिकार फोरम (लोकतान्त्रिक)या न्ह्यम्ह सभासदतय्सं वर्तमान सरकारयात ब्यूगु समर्थन लितकायेगु घोषणा याःगु दु ।
शनिवाः येँय् छगू पत्रकार सम्मेलन यानाः उमिसं उपराष्ट्रपति परमानन्द झाया सपथ प्रकरणय् सरकारं साथ मब्यूगु धासें सरकारयात ब्यूगु समर्थन लितकायाःगु धाःगु दु । पार्टीं आधिकारीक रुपं समर्थ लितमाकानिसां थःपिनिगु समर्थन सरकारयात मदइगु घोषण पत्रकार सम्मेलनय् न्ह्यम्ह सभासदतय्सं याःगु खः ।
पत्रकार सम्मेलन यानाः समर्थन लितकापिं फोरम लोकतान्त्रिकया सभासदत कौशलकुमार राय यादव, प्रमोद गुप्ता, महमद ओकिल मुसलमान, निलम बर्मा, ललीता साह, रामानन्द मण्डल व आशाकुमारी सरखार दु ।
सभासदतय्सं सर्वोच्च अदालतया फैसला गलत जुसां सरकारं साथ मब्यूगु व उपराष्ट्रपतिया राजकीय सुविधा लितकायेवं थःपिं सरकारयात ब्यूगु समर्थन लितकायेत बाध्य जुयाःगु धा:गु दु । सभासदतय्सं थुकी मेपिं च्याम्ह सभासदतय् नं समर्थन दुगु व थुकी छन्हु-निन्हु दुने पार्टीं ठोस निर्णय मकासाः गम्भीर पलाः ल्ह्वनेमालेफु खँ धाःगु दु ।
अथेहे पत्रकार सम्मेलन लिपा न्ह्यम्ह सभासदतय्सं मंकाः रुपं पिथंगु विज्ञप्तिइ फोरम लोकतान्त्रिक पाखें सरकारय् दुथ्यापिं दक्वं मन्त्रीतय्त अविलम्व राजिनामा बिया मधेश विरोधी सरकारयात ब्यूगु समर्थन लित कयाः मधेशीया मान-सम्मान व भावनाया सम्मान यायेत इनाप याःगु दु ।
लुमंकेबहजू, वंगु बुधवाः तिनि फोरम लोकतान्त्रिक पाखें च्याम्ह नेतात दुथ्याकाः मन्त्रिपरिषदया खुक्वःगु पटक बिस्तार याःगु खः ।
अथेहे राष्ट्रिय जनमुक्ति पार्टीं नं वर्तमान एमाले नेतृत्वया सरकारयात ब्यूगु समर्थन लितकाःगु दु । पार्टीया जारी केन्द्रीय कमिटिया बैठकं शनिवाः उगु निर्णय पारित याःगु खः ।
संसदय् निम्ह सभासद दुगु उगु पार्टीं वर्तमान सरकार संविधान निर्माण प्रकृयाय् केन्द्रीत मजूगु व दक्वं आदिवासी, जनजाति, दलित व अल्पसंख्यक समुदायया अधिकारया आन्दोलनयात दमन यायेत सुरक्षा नीति हःगु निष्कर्ष पिकासें राजपां सरकारयात ब्यूगु समर्थत लितकाःगु खः ।
