पशुपति घटनाय् झी संलग्न मदु : माओवादी
एकीकृत नेकपा (माओवादीं) शुक्रवाः पशुपतिलय् जूगु घटनाय् माओवादीया संलग्नता मदुगु स्पष्ट याःगु दु ।
माओवादीया अन्तर्राष्ट्रिय विभागा इन्चार्ज कृष्णबहादुर महरां शनिवाः छगू विज्ञप्ति पिथना धार्मिक सदभाव स्यंकेगु व हस्तक्षेप यायेगु थःगु पार्टीया नीति मदुगु धासें जनसमुदायया स्वतन्त्र संघर्षया विषययात अनावश्यक व पूर्वाग्रही रुपं थःगु पार्टी प्रति लक्षित मयायेत इनाप याःगु दु ।
विज्ञप्तिइ माओवादी पार्टी जनताया धार्मिक स्वतन्त्रताप्रति विश्वास याइ व जनसमुदायया छुं नं विषयलय् विरोध वा समर्थन यायेगु स्वतन्त्र अधिकार व भावनाया सम्मान याइ धकाः न्ह्यथंनातःगु दु ।
अथेहे पशुपतिया पुजारीलय् नेपाली नागरिक नियुक्त जुइमाः धइगु माग नेपाली जनसमुदायं ताहाकःगु ई न्ह्यः निसें ल्ह्वना वयाच्वंगु धकाः विज्ञप्तिइ न्ह्यथंसें सरकारं पुजारी नियुक्ति सम्बन्धि याःगु निर्णय प्रति असहमत जुया जनसमुदायया पाखें संघर्ष समिति गठन जुया संघर्ष यानावयाच्वंगु खँ नं न्ह्यंथनातःगु दु ।
