माओवादीं हानं विद्रोह यायेफु : प्रचण्ड
एकीकृत नेकपा (माओवादी)या अध्यक्ष पुष्पकमल दाहाल 'प्रचण्डं' संविधानसभा विघटन यासाः माओवादीं हानं जनविद्रोह याइगु ख्याच्वः बियादीगु दु ।
अखिल नेपाल प्रगतिशिल जनस्वास्थ्यकर्मी संघं शनिवाः येँय् याःगु ज्याझ्वलय् थीथी प्रतिकृयावादी शक्तितय्सं संविधानसभा विघटन यायेगु व संविधान निर्माण यायेमबीगु षडयन्त्र यानाच्वंगु दाबी यानादिसें अज्याःगु अवस्था वसाः माओवादी विद्रोह याइ धयादिल ।
वर्तमान सरकारं माओवादीयात हानं युद्ध पाखे घ्वानाच्वंगु धयादिसें प्रचण्डं सत्तारुढ दलतय्सं दुर्घटनाया स्थिति उत्पन्न यानाच्वंगु दाबी यानादिल । वयेकलं सहमतिया आधारय् न्ह्यावंसाः जक भविष्यय् दुर्घटना मजुइगु बिचाः प्वंकादिल ।
अथेहे वयेकलं वर्तमान सरकारं छुं नं निर्णय यायेमफइगु दाबी नं यानादिल । वयेकलं आःया सरकारयात राष्ट्रपितं घाःपा याःगु धयादिसें थुकीया वासः जनतां याइ धयादिल । वयेकलं माओवादीं नागरिक सर्वोच्चताया निंतिं सुं नाप नं सम्झौता मयायेगु धयादिल ।
