प्रधानमन्त्री नेपाल नापया स्वापू स्यंगू मदु : पौडेल
नेपाली कांग्रेसया उपसभापति रामचन्द्र पौडेलं प्रधानमन्त्री माधवकुमार नेपाल नाप कांग्रेसया स्वापू मस्यंगु खँ धयादीगु दु ।
शनिवाः येँया रिपोटर्स क्लबय् जूगु साक्षात्कार ज्याझ्वलय् नेता पौडेलं प्रधानमन्त्री नाप कांग्रेसया स्वापू बांलागु व वर्तमान सरकारयात कांग्रेसया पूर्ण समर्थन व साथ दुगु धयादिल । वयेकलं वर्तमान सरकारया विकल्प मालेगु धइगु देशय् दुर्घटनायात सतिकेगु ज्या जक जूगु धयादिल । नेता पौडेलं आःया सरकारया विकल्प मालेमज्यूगु पक्षय् कांग्रेस सभापति गिरिजाप्रासद कोइरालाया नं बिचाः जूगु धयादिल । वयेकलं थ्वहे सरकारं शान्ति प्रकृयायात तार्किक निष्कर्षय् थ्यंकीगु, संविधान च्वइगु व संसदीय चुनाव यानाः न्हूगु सरकारयात सत्ता हस्तान्तरण याइगु दाबी यानादिल ।
कांग्रेस संसदीय दलया नेता नं जुयादिम्ह पौडेलं सभापति कोइरालाया इनाप कथं महासमितिया बैठक स्थगित याइगु कनादिल । वयेकलं शनिवाः जूगु कांग्रेसया अनौपचारी बैठकय् कोइरालां महासमितिया बैठक यायेवं महाधिवेशन यायेत खर्च तसकं अप्वजुइगुलिं महासमितिया बैठक स्थगित यायेत इनाप यानादीगु धयादिल ।
