राष्ट्रपतिया असंवैधानि पलाः संसदं हे पुष्टी यायेमाः : बादल
एकीकृत नेकपा (माओवादी)या महासचिव रामबहादुर थापा 'बादलं' राष्ट्रपतिं ल्ह्वंगु असंवैधानि पलाःया बारे संसदं हे पुष्टी यायेमाःगु खँ धयादीगु दु ।
थीथी राजनीतिक दलं माओवादी दुहांवपिंत लसकुस यायेत माओवादीया रुपन्देही जिल्ला कमिटिं बुटवलय् याःगु ज्याझ्वलय् महासचिव बादलं राष्ट्रपतिया पलाः विरुद्ध माओवादीया आन्दोलन नागरिक सर्वोच्चता व जनतन्त्रया लडाइ जूगु धयादिसें संसद पाखें सहलह यानाः राष्ट्रपतिं पलाः मिभंकूसाः आन्दोलन मदिकेगू ख्याच्वः बियादिल ।
वयेकलं माओवादीं न्ह्याकूगु स्वक्वःगु जनआन्दोलन न्हापांगु चरणय् न्ह्याः वनाच्वंगु व थ्व याकनं सिधया संक्रमणकालया अन्त्य जुइगु दाबी यानादिल । वयेकलं वर्तमान सरकारया विघटन व माओवादी नेतृत्वया सरकारया विकल्प मदुगु दाबी यानादिल ।
उगु ज्याझ्वलय् राष्ट्रिय जनशक्ति पार्टीया केन्द्रीय दुजः प्रदीप उदय सहित थीथी दलया नेता व कार्यकर्तात माओवादी प्रवेश याःगु खः ।
