माओवादी आन्दोलनयात जनतां प्रतिकार याइ : प्रधानमन्त्री
प्रधानमन्त्री माधवकुमार नेपालं अर्थहीन एकीकृत नेकपा (माओवादी)या आन्दोलनं जनता आजित जुइधुंकूगुलिं आः जनतां हे थंज्याःगु आन्दोलनया प्रतिकार याइगु खँ धयादीगु दु ।
मनमोहन स्मृति सामुदायिक अस्पतालया फर्पिङय् उल्लेज्या यानादिसें प्रधानमन्त्री नेपालं आः विद्रोह, आन्दोलन व बहिष्कार थंज्याःगु आन्दोलनया छुं नं तुक मदुगु धयादिसें माओवादी आन्दोलनया आलोचना यानादिल । वयेकलं सरकार क्वदली धकाः म्हगसय् मखंकेत इनाप यानादिसें थ्वहे सरकारं शान्ति प्रकृयायात तार्किक निष्कर्षय् थ्यंकी, संविधान च्वइ व मेगू निर्वाचन सम्मपन्न याइगु दाबी यानादिल ।
फर्पिङय् सामुदायिक अस्पतालया उल्लेज्या नापं अस्पताल परिसर दुने पुलांम्ह एमाले अध्यक्ष मनमोहन अधिकारीया झ्वाताःया नं शिलन्यास यानादिसें प्रधानमन्त्री नेपालं थःगु नेतृत्वया सरकारं सच्छिन्हु दुने हे तधंगु उपलब्धी हालिस याःगु दाबी यानादिसें संविधानसभा अर्न्तगत संवैधानिक समितिया सभापतिया अध्यक्ष ल्ययेगु ज्या थःगु यपलब्धी जूगु धयादिल ।
