विशेष सुरक्षा नीतिया विकल्प मदु : गृहमन्त्री
गृहमन्त्री भीम रावलं राज्य पुनसंरचनाया सहजता व शान्ति प्रकृयायात तार्किक निष्कर्षय् थ्यंकेगु निंतिं विशेष सुरक्षा नीति हयागु खँ धयादीगु दु ।
सुरक्षा निकायया पदाधिकारीतय् मध्यपश्चिमाञ्चल स्तरिय सुरक्षा गोष्ठीया शनिवाः नेपालगञ्जय् उल्लेज्या यानादिसें गृहमन्त्री रावलं मधेशीतय्त दबे यायेत विशेष सुरक्षा नीति हःगु धकाः प्रचार याःगु प्रति आपत्ति प्वंकादिसें दण्डहीनताया अन्त्यया निंतिं सरकारं सुरक्षा नीति अख्तियार याःगु धयादिल ।
वयेकलं दक्वसियां लोकतान्त्रिक अधिकारयात संसथागत यायेत विशेष सुरक्षा नीतिया विकल्प मदुगु धयादिल । कानुन उल्लघंन याइपिं न्ह्याम्हेसित नं कारवाही यायेत सुरक्षाकर्मीतय्त निर्देशन बियादिसें वयेकलं राजनीतिक दलया दबाय् वयाः ज्या मयायेत इनाप यानादिल ।
अथेहे ज्याझ्वलय् गृहराज्यमन्त्री मोहमद रिजवान अन्सारीं प्रहरी व प्रशासन दुने बांलागु ज्या याइपिंत सिरपा बीगू व बांमलाःगु ज्या याइपिंत दण्ड बीगू वातावरण निर्माण जूगुलिं दक्वं प्रहरी व प्रशासनिक अधिकारीतय्त दे लुमंका ज्यायेत इनाप यानादिल ।
मध्यपश्चिमया १५ जिल्लया प्रमुख जिल्ला अधिकारी, सशस्त्र व नेपाल प्रहरी व राष्ट्रिय अनुसन्धान विभागया प्रमुखतय्गु ब्वति दुगु क्षेत्रीय सम्मेलन आइतवाः तक न्ह्याइ ।
