कडा सुरक्षाया दथुइ भारतीय पुजारी पशुपति प्रवेश
सरकारं पशुपतिलय् नियुक्त यापिं निम्ह भारतीय भट्ट पुजारीत कडा सुरक्षा व्यवस्था दथुइ शनिवाः सुथय् मुलभट्ट महावलेश्वरं दीक्षा कयाः औपचारिक रुपं ज्या शुरु याःगु दु । भारतीय पुजारी नियुक्त याःगु धासें विवाद जुइवं सरकारं कडा सुरक्षा बियाः पुजारीत गिरीश भट्ट व राघवेन्द्र भट्टयात पशुपति क्षेत्रया झिंछगू देग: चाहिकूगु दु ।
सुरक्षा सम्वेदनशीलताया ध्यानय् तया सरकारं शनिवाः सुथय् ७ बजे निसें न्हिनय् २ बजे तक सर्वसाधारणयात पशुपति प्रवेश यायेत रोक लगे याःगु खसाः भट्ट पुजारीतय्सं परिक्रमा यानाच्वंतल्ले पशुपतिइ तकं संचारकर्मीतय्त दुहांवने मब्यूगु खः ।
पशुपति प्रवेश यानाः भारतीय पुजारी नियुक्ति संघर्ष समितिया दुजःतय्सं पुजारीयात दायेवं शुक्रवाः येँय् जिल्ला प्रशासनं पशुपति देगःया २ सय मिटर क्षेत्रयात निषेधित क्षेत्र घोषणा याःगु खः ।
थ्वया दथुइ भारतीय पुजारीतयत दाःगु विषययात कयाः भारतं च्यूता प्वंकूगु दु । बिबिसी हिन्दी सेवाया कथं भारतं थुकीया बारे च्यूता प्वंकूसें नेपाः सरकार नाप वार्ता याःगु दु । अथेहे भारतीय राजदू राकेश सुद संस्कृति मन्त्री मिनेन्द्र रिजाल नाप शनिवा: पशुपति थ्यंकादीगु दु । वयेकपिं अनं थ्यंकूगु ईलय् प्रदर्शकारीतय्सं विरोध प्रदर्शन यासें राष्ट्रिता सम्बन्धी नारा थ्वयेकूगु खः ।
