नेपाःया न्हूगु राजधानी दाङ सारे यायेत नेमकिपाया प्रस्ताव

१४ प्रदेश व ७५ जिल्लाया प्रस्ताव

नेपाल मजदुर किसान पार्टीं गणतन्त्र नेपाःया राजधानी मध्य पश्चिमया दाङ उपत्यकाय् सारे यायेत प्रस्ताव याःगु दु । अथेहे राज्य पुनसंरचान यायेवलय् १४ प्रदेश व ७५ जिल्ला दयेकेत नं उगु दलं प्रस्ताव याःगु दु ।

संविधानसभाया राज्य पुनसंरचना समितिलय् पार्टीया राज्य पुनसंरचना सम्बन्धी अवधारण पौ न्ह्यब्वयादिसें पार्टी अध्यक्ष नारायणमान विजुक्छे 'रोहितं' भूगोलया आधारय् सिमांकन व नक्सांकन यायेमाः धयादिल । आः दुगु १४ अञचलयात हे प्रदेश दयेकेत प्रस्ताव याःगु खसाः धवलागिरीया नां हिला अन्नपूर्ण दयेमाःगु खँ नं प्रस्तावय् न्ह्यथंनातःगु दु । अथेहे सगरमाथा अञ्चलया सदरमुकाम धाःसा गाइघाट सारे यायेत प्रस्ताव याःगु दु ।

बाग्मती अञचलय् लाःगु च्यागू जिल्लात मध्ये धादिङ, नुवाकोट व रसुवायात चीकाः नारयाणी अञ्चलय् दुगु मकवानपुर व रौतहटया थपे यानाः बाग्मती प्रान्तया प्रस्ताव याःगु दु । अथेहे न्यागू जिल्ला दुगु नारायणी अञ्चलय् रौतहट व मकवानपुरयात बाग्मती प्रान्तय् दुथ्याकूगुलिं बाग्मती पाखें रसुवा, धादिङ व नुवाकोट नारायाणी प्रान्तय् दुथ्याका खुगू जिल्ला दयेकेत प्रस्ताव याःगु दु ।

लुम्बिनी अञ्चलया नवलपरासीयात गण्डकी प्रान्तय् तयातःगु दुसाः गोरखा, लमजुङ, स्याङ्जा व तनहु जिल्लायात गण्डकीया मेमेगू जिल्ला कथं दुथ्याकातःगु दु । स्याङ्जाया पश्चिमि ९ गाविसयात पर्वतय् दुथ्याका अन्नपूर्ण प्रान्तय् सारे यायेगु खँ न्ह्थंनातःगु दु । गण्डकीलय् लाःगु मनाङनिसें कास्की, धवलगिरीया पर्वत, लुम्बिनीया पाल्पा व भारत नाप सीमा जोडेजूगु रुपन्देही तक मिलेयानाः अन्नपूर्ण प्रान्त दयेकेमाःगु प्रस्ताव याःगु दु

लुम्बिनीलय् कपिलवस्तु, गुल्मी, अर्घाखाँची व धवलागिरी अञ्चलया म्याग्दी, बाग्लुङ, मुस्ताङ तयातःगु दु । थुकीया सदरमुकाम बाग्लुङ यायेत नं प्रस्ताव याःगु दु ।

राप्ती प्रान्तय् सल्यान चीकाः उकीया पलेसा कर्णालीया डोल्पा दुथ्याकूगु दु । अथेहे थुगु प्रान्त नं भारत व चीन निगूलि देय् नाप सीमा जोडे जुइ । थुकीया सदरमुकाम कथं लिवाङ प्रस्ताव याःगु दु ।

भेरी प्रान्तय् कर्णाली अञ्चलया मुगु व जुम्लायात दुथ्याकेगु, जाजरकोट व बाँके नापं राप्ती अञ्चलया सल्यान दुथ्याका भेरी प्रान्त जुइगु खँ अवधारण पौलय् न्ह्यथनातःगु दु । मुगुया दक्षिण-पश्चिमया ७ गाविस धाःसा कालिकोट जिल्लाय् दुथ्याकेगु व जुम्लाया खलंगायात सदरमुकाम दयेकेत प्रस्ताव या:गु दु ।

कर्णाली प्रान्तय् धाःसा आःया निगू जिल्ला हुम्ला व कालिकोट दुथ्याइसाः दैलेख, सुर्खेत व बर्दिया जिल्ला दुथ्याकाः कर्णाली प्रान्त दयेकेगु प्रस्ताव याःगु दु । अथेहे वीरेन्द्रनगरया सुर्खेतयात सदरमुकाम प्रस्ताव यानातःगु दु । कालिकोट जिल्लाया पश्चिमया १२ गाविसयात धाःससा अछामय् दुथ्याकातःगु दु ।

प्रस्तावित अवधारण पौलय् सेती प्रान्तय् बझाङ, बाजुरा, डोटी, अछाम व कैलालीयात दुथ्याकातःगु दुसाः महाकाली प्रान्त आःया महाकाली अञ्चल थें हे प्रस्ताव यानातःगु दु ।