चिनियाँ नेतातय् भ्रमण व आशंका
येँ (सन्ध्या टाइम्स)/ चिनियाँ कम्युनिष्ट पार्टी पोलिटब्यूरो दुजः चाङ्ग कोइ लीया नेतृत्वय् नेपालय् वयाच्वंगु प्रतिनिधि मण्डलया भ्रमणयात कयाः थन थीथी कथंया विश्लेषण जुयाच्वंगु दु ।
भाजु चाङं भ्रमणया झ्वलय् तिब्बती शरणार्थीतय्सं नेपालय् यानाच्वंगु गतिविधि व सुरक्षायात विशेष बः बिउगु खः ।
वय्कलं प्रधानमन्त्री माधव नेपाल, माओवादी अध्यक्ष प्रचण्ड व कांग्रेस सभापति गिरिजाप्रसाद कोइरालायात नापलासें सुरक्षाया बारे विशेष रुपं चिउताः प्वंकादीगु खः। उगु इलय् फुक्कं नेतातय्सं नेपाः 'छगू चीन' नीतिया पक्षय् दुगु व चीन विरोधी छुं हे गतिविधि याके मबीगु बचं बिउगु खः ।
छुं विश्लेषकतय्सं धाःसा चाङया थ्व भ्रमणयात चीनं नेपालय् थः नं छम्ह प्रमुख खेलाडी खः धकाः क्यनेत याःगु भ्रमण खः धाःगु दु ।
थ्व भ्रमण नेपालय् चीनया नं बल्लाःगु उपस्थिति दु धकाः क्यनेत जूगु बिचाः पुलांम्ह परराष्ट्र मन्त्री चक्रप्रसाद बास्तोलां प्वंकादी। उखे परराष्ट्र मन्त्रालयं धाःसा चिनियाँ प्रतिनिधिया थ्व भ्रमण नियमित जक खः धासें न्हापा न्हापा नं थज्याःगु भ्रमण जुयाच्वं तर सार्वजनिक जक मजूगु दावी याःगु दु।
संविधानसभाया निर्वाचन लिपा जक नेपालय् निगू दर्जनं मल्याक चीनया उच्चस्तरीय नेतातय्सं भ्रमण यायेधुंकूगु दु। थ्व फुक्कं भ्रमणय् अप्वः धइथें तिब्बती शरणार्थी बारे खँ जुइगु खः। तारन्तार जःलाखःला देय्या दूततय् थ्व भ्रमणयात संवेदनशील रुपय् कायेमाःगु विश्लेषकतय् राय दु। चिनियाँ प्रतिनिधित थौं लिहां वनीगु ज्याझ्वः दु ।
