ल्वापु बारे एमालेया बैठक
येँ (सन्ध्या टाइम्स)/एमाले दुने ब्वलंगु विवाद साम्य यायेत थौं स्थायी समितिया बैठक च्वंगु दु। पार्टी ज्याकू बल्खुइ च्वंगु उगु बैठकय् पार्टी दुने खनेदुगु विवाद बारे सहलह जुयाच्वंगु खः ।
अथे हे बैठकय् एमालेया नेतृत्वय् गठन जूगु सरकारया सछिन्हुया ज्याया नं समीक्षा याइगु ग्वसाः दु ।
बैठकय् महाधिवेशनं पारित याःगु विधान मखुसें मेगु हे विधान छापे जुया वःगु धासें नेता केपी ओलीं दर्ता याःगु प्रस्तावयात कयाः नं सहलह जूगु दु ।
बैठकय् पार्टीया आन्तरिक सुदृढीकरणया निंतिं गोप्य व खुल्ला रुपं क्षेत्रीय भेला यायेगु बारे नं सहलह जुइसा एमाले अध्यक्ष झलनाथ खनालं यानादीत्यंगु चीन भ्रमणयात कयाः नं सहलह याइगु खँ धाःगु दु। थ्व इलय् एमाले दुने झलनाथ पुचः व ओली पुचःया दथुइ विवाद जुयाच्वंगु दुसा माधव पुचलं उकियात साम्य यायेत स्वयाच्वंगु दु ।
