पशुपतिइ परम्परा विरुद्ध पुजारी
येँ (सन्ध्या टाइम्स)/ पशुपतिइ नियुक्त यायेत्यंपिं भारतीय पुजारीतय् नियुक्ति प्रक्रियाय् सरकारं धार्मिक परम्परा समेत त्वाःथलेत्यंगु द्वपं स्थानीय मनूतय्सं बिउगु दु। अन नियुक्तिया लागिं म्हीगंनिसें 'गुफा' तःपिं निम्ह पुजारीतय्त स्वन्हु तक कुनेमाःगु खःसां निन्हु जक कुनाः थौं हे लिकायेत्यंगु खँ धाःगु दु। कन्हय्निसें सोह्र श्राद्ध शुरु जुइगु जूगुलिं कन्हय् याइगु पुजापाठ शुद्ध मजुइगु जुयाः उमित थौं हे लिकायेफुगु खँ धाःगु दु। छुं जुयाः स्वन्हु तक कुनाः कन्हय् हे लिकाःसां सोह्र श्राद्ध शुरु जुइधुंकूगु कारणं थ्व नं धार्मिक परम्परा विरोधी जुइगु उमिगु दावी दु। अथे हे उमित गुफा तइबलय् सँ खाकाः जक तयेमाःथाय् थुगुसी सँ हे मखाकुसे तःगु खँ नं धाःगु दु ।
भारतीय पुजारीया विरोध यायेत नीस्वंगु संघर्ष समितिं थौ बहनी पशुपति जःखः मशाल जुलुस पिकायेगु तयारी यानाच्वंगु दुसा थौं सुथंनिसें अन प्रशस्त मात्राय् सशस्त्र प्रहरी नं पाः तयातःगु दु ।
थ्वहे झ्वलय् संघर्ष समितिया दुजः जलद वैद्यं अन भारतीय पुजारीयात लिकयाः पुलांगु परम्परा कथं नेवाः ब्रम्हू राजोपाध्याययात हे पुजारी तयेमाःगु बिचाः प्वंकादीगु दु ।
