माओवादी पाखें आन्दोलनया निंतिं सुझाव माग
नागरिक सर्वोच्चताया माग यासें आन्दोलनरत एकीकृत नेकपा (माओवादी)या मोर्चा संयुक्त राष्ट्रिय जनआन्दोलनं थीथी क्षेत्रया व्यक्तित्वत नाप सहलह यानाः सुझाव फ्वंगु दु ।
आन्दोलनया कथं हे थीथी ख्यःया व्यक्तित्व नाप सहलह यायेगु ज्याझ्वः कथं शुक्रवाः येँय् ग्वसाःग्वःगु अर्न्तक्रियाय् माओवादी सरकारं प्रधानसेनापति नियुक्त याम्ह कुलबहादुर खड्का, नेपाली कांग्रेसया नेता नरहरि आचार्य नापं व्यापारी, कलाकार, थीथी राजनीतिक दलया नेतात, नागरिक समाज व थीथी ख्यःया व्यक्तित्वतय्सं माओवादीयात सुझाव ब्यूगु खः ।
अर्न्तक्रियाय् माओवादी अध्यक्ष पुष्पकमल दाहाल 'प्रचण्डं' आन्दोलन यायेमाःगु कारण व राजनीतिक घटनाक्रमया बारे माओवादीया धारण न्यंकादीगु खः । सेनायात लोकतान्त्रिक-करण मयागुलिं हे २००७ साल निसेंया आन्दोलनया उपलब्धी संरक्षण मजूगु जिकीर यानादिल । वयेकलं सरकारया आदेश पलना मयाम्ह प्रधानसेनापति रुक्मांग कटवालयात कारवाही नं लोकतान्त्रिक दयेगु निंतिं हे यानागु धयादिल ।
अध्यक्ष प्रचण्डं संविधानसभा भंग यायेत देय् दुने व पिनेया प्रतिकृयावादीतय्सं षड्यन्त्र यानाच्वंगु धयादिसें थुकीया विरुद्ध दक्वं छप्पं जुया सः मथ्वयेकुसाः देय् दुर्घटनाय् वनी धयादिल । वयेकलं देययात गुकथं प्याछिगु लँपूइ ह्येफइ धकाः बिचाः यायेमाःगु धयादिसें सुयातं द्वपं बीगु ज्या मयाये धयादिल ।
आन्दोलनया अध्यक्ष डा. बाबुराम भट्टराईं वःगु सुझावया आधारय् माओवादी न्ह्याः वनीगु धयादिल । वयेकलं बेरोजगारी, उत्पीडन विरुद्ध व परिवर्तनया निंतिं आन्दोलन अपरिहार्य जूगुलिं हे आन्दोलन न्ह्याकाःगु दाबी यानादिल ।
शान्ति व संविधानसभा प्रति माओवादीयात अनावश्यक शंका मयायेत इनाप यानादिसें थःपिंसं हे बुइकूगु संविधानसभा व शान्ति प्रति थःपिंत थें माया सुयातं मदुगु दाबी वयेकलं यानादिल ।
ज्याझ्वलय् कांग्रेस नेता आचार्यं राष्ट्रपतिं द्वंकूगु खसां सदन अवरुद्ध मयासें महाअभियोग वा संविधान संशोधणया लँपूइ वनेत सुझाव बियादिल ।
अथेहे माओवादी सरकारं प्रधानसेनापतिलय् नियुक्त याम्ह खड्कां नीनिगू दलं माओवादीयात याकचाः दयेकेत स्वःगु धयादिसें थुकीं समस्याया समाधान पिहांमवइगु धयादिल । अथेहे वयेकलं माओवादी नाप थम्हं छुं सम्झौता मयानाःगु दाबी यानादिसें संचार माध्यमं थःगु नां माओवादी नाप स्वाःगु प्रति आपत्ति प्वंकादिल ।
मानवअधिकारवादी नेता कृष्ण पहाडीं नीनिगू दलं माओवादीयात आतंकवादी धकाः प्रचारयुद्ध न्ह्याकूगु धयादिसें उकीयात मलजल जुइकथं हिंसात्मक आन्दोलन मयायेत माओवादीयात सुझाव बियादिल ।
