'नेतात अनुशासनहीन जुल'
अनुशासित जुइत निर्देशन
नेकपा (एमाले) केन्द्रीय अनुशासन आयोगं पार्टीया आन्तरिक जीवन बारे सार्वजनिक रुपय् पार्टीया विधानयात माने मयाइपिं, पार्टी निर्णययात हाथ्या बीपिं व अवज्ञा याइगु थंज्याःगु प्रवृति प्रति गम्भीर आपत्ति प्वंकूगु दु ।
उगु आयोगया शुत्रवाः च्वंगु बैठक लिपा पिथंगु विज्ञप्तिलय् आन्तरिक सहलह यानाः ज्यंकेमाःगु विषययात सार्वजनिक विवादया विषय दयेकूगु धासें आपत्ति प्वंकूगु खः ।
आयोगया बैठकं नेतातय्त च्याक्वःगु महाधिवेशनं पारित निर्णयत कार्यान्वयन व संगठनयात सुदृढ यानाः राजनीतिक वैचारिक व सांगठानिक क्षेत्रय् खनेदुगु हाथ्यात छप्पं जुया समाधान यायेगु पाखे न्ह्या वनेत इनाप याःगु दु ।
थ्वस्वयां न्ह्यः एमालेया स्थायी समितिया बैठकं नेतातय् अनुशासित जुइत निर्देशन ब्यूगु ख: । एमालेया मू ज्याकू बल्खुइ च्वंगु स्थायी समितिया बैठकय् पार्टी अध्यक्ष झलनाथ खनालया (संस्थापन पक्ष) व केपी शर्मा ओली पक्ष दथुइ सार्वजनिक थासय् छगू पक्षं मेगू पक्षयात द्वपं ब्यूगु प्रति स्थायी समितिया दुजतय्सं असहमति प्वंकूसें निगूलिं पक्षयात अनुशासित जुइत इनाप याःगु ख: ।
बैठकं पार्टी दुनेया असन्तुष्टियात पार्टी दुने हे संस्थागत प्रकृयां सहलह यायेमाःगु निष्कर्ष नं पिकाःगु खँ एमाले महासचिव ईश्वर पोखरेलं कनादिल । थुकीया बारे पार्टीया संगठन विभागय् नं सहलह जुइगु जानकारी वयेकलं बियादिल ।
बैठकय् न्ववानादिसें प्रधानमन्त्री माधवकुमार नेपालं गुट उपगुटया राजनीतिं पार्टीयात नं असर लाकूगु धयादिसं पार्टीलय् अनुशासन व आचारसंहिता कडाईया साथ लागू यायेमाःगु खँय् बः बियादिल । अथेहे बैठकय् न्ववापिं मेपिं दुजःतय्सं नं पार्टीया नेतात तच्वयेकं अनुशासनहीन जूगु निष्कर्ष पिकाःगु खः ।
