हडताल दिकाः वार्ताय् वयेत स्वास्थ्य मन्त्रीया इनाप
स्वास्थ्य मन्त्री उमाकान्त चौधरीं नर्सतय्त आन्दोलन दिकाः वार्ताय् वयेत इनाप यानादीगु दु ।
शुक्रवाः बाराया कलैयाय् जूगु उद्योग वाणिज्य संघया ज्याझ्वलय् न्ववानादिसें वयेकलं थः वार्ताय् च्वनेत तयार दुगु धयादिसें नर्सतय्त आन्दोलन दिकेत इनाप यानादिल । वयेकलं म्वायेकं म्वायेकं बिरामीया स्वास्थ्य नाप खेलबाड मयायेत नं आन्दोलनकारी नर्सतय्त इनाप यानादिल । वयेकलं नर्सतय् दक्वं माग सम्बोधन यायेत मन्त्रालयं प्रकृया न्ह्याके धुंकूगु जानकारी नं ज्याझ्वलय् बियादिल ।
नर्सतय् थीथी माग पुवंकेत सरकार तयार जूगु धयादिसें स्वास्थ्यमन्त्री चौधरीं रजिष्टार नियुक्तिया खँ राजनीतिक जूगुलिं थुकीयात 'बखेडा' मदयेकेत इनाप यानादिल । रजिष्टारया नियुक्ति कानुनी नियुक्ति जूगुलिं थुकीयात मेगू हे कथं कायेगु ठीक मजूगु धयादिल । अथेहे वयेकलं मेमेगू माग बारे सरकार सकारात्मक जूगु कनादि ।
मन्त्री चौधरीं थः येँय् लिहावनेवं वार्ता यायेत तयार जूगु धयादिसें थौं बाराय् ज्याझ्वः दुगुलिं वार्ता च्वने मफुगु धयादिल ।
