'अपराधीयात बचे यायेत सुरक्षा योजनाया विरोध'
गृहमन्त्री भीम रावलं संविधान निर्माण व शान्ति प्रकृयायात तार्किक निष्कर्षय् थ्यंकेगु सरकराया न्हापांगु प्राथमिकता जूगुलिं शान्ति सुरक्षा अत्यावश्यक जूगु खँ धयादीगु दु ।
पोखराय् जूगु पश्चिमाञ्चलस्तरीय सुरक्षा सम्मेलन लिपा शुक्रवाः मेचीमहाकाली मिडिया सोसाइटी नेपालं ग्वसाःग्वःगु पत्रकार सम्मेलनय् वयेकलं देशय् शान्ति कायम यायेत सरकारं विशेष सुरक्षा योजना हःगु धयादिल ।
देशय् शान्ति सुरक्षा कायम यायेत नागरिक समाज, राजनीतिक दलनाप मिलेजुया न्ह्याः वनेगु खँ वयेकलं पत्रकार सम्मेलनय् कनादिल । शान्ति सुरक्षा कायम जुइमबीत व लोकतान्त्रिक गणतन्त्रया संस्थागत विकासयात अवरुद्ध याये चाहेजुपिं व अपराधीतय्त बचे यायेत स्वइपिंसं विशेष सुरक्षा योजनाया कु-प्रचार यानाच्वंगु द्वपं बियादिल ।
अथेहे मेगू छगू प्रशंगय् गृहमन्त्री रावलं ज्याकेट प्रकराणय् अनियमिता जूगु ठहर जुसाः दोषीयात प्रचलित कानुन कथं कारवाही यायेगु स्पष्ट यानादिल ।
