माओवादी पाखें १७गू प्रदेश प्रस्ताव
एकीकृत नेकपा (माओवादीं) संविधानय् स्थानीय् निकाय नं स्वायत जुइगु प्रावधन सहित १७गू प्रदेशया प्रस्ताव याःगु दु ।
बिहीवाः संविभान सभाया राज्य पुनसंरचना समितिलय् लःल्हाःगु माओवादीया अवधारणा पौलय् १३गू राज्य व ४गू क्षेत्रिय प्रदेशया प्रस्ताव यानातःगु दुसाः क्षेत्रिय बाहेक दक्वं राज्ययात आत्मनिर्णयया अधिकार दयेमाःगु खँ प्रस्तावय् न्ह्यथंनातःगु दु । क्षेत्रिय राज्या धासाः तप्यंक केन्द्रया संविधान कथं संचानल जुइमाःगु प्रस्ताव दु । जातिय प्रदेश दुने इलाका नं जनसंख्या व भाषाया आधारय् स्वायत जुइगु प्रस्ताव माओवादीं याःगु दु ।
आः दुगु ३९१४ गाविसयात ८०० निसें ९०० तक चीधंगू इकाइलय् रुपान्तरण यायेगु व उकीयात आःयाथें जिल्ला सरह दयेके माःगु खँ अवधारणा पौलय् न्ह्थंनातःगु दु । माओवादीं न्ह्यब्वःगु अवधारणय् सेतीमहाकाली, भेरीकर्णली, थारुवान, मधेश, मगरात, तमुवान, ताम्सालिङ, नेवाः, कोचिला, किराँत, लिम्बुवान, सेर्पा व भोटेला स्वायत प्रदेश निर्धारण या:गु दु ।
अथेहे जाति विशेषया स्पष्ट बाहुल्यता मदुगु रिडी, तामाकोसी, नारायणी व विजयपुरयात क्षेत्रिय राज्य दयेकीगु प्रस्ताव याःगु दु ।
माओवादीया अवधारणा पौ न्ह्यब्वयादिसें समितिया दुजः देव गुरुङं राज्यया सीमाङकन बारे लचकता क्यनेफुसां नं राज्ययात स्वायत दयेकीगु विषयलय् सम्झौता मयायेगु धयादिल । केन्द्रीय संविधानं राज्यया स्वरुप बारे व्याख्या यायेमाःगु व मेगू दक्वं ऐन, कानुन राज्य थम्हं हे निर्माण यायेमाःगु खँ नेता गुरुङं धयादिल ।
समितिलय् दुथ्याःगु झिंछगू दलतय्सं थःथःगु राज्य पुनसंरचानाया अवधारणा लःल्हाये धुंकूगु दुसां सत्ता साझेदार नेपाली कांग्रेस व नेकपा (एमालें) थःगु दलया अवधाराण लःल्हाःगु मदुनि ।
